ဟာသမထုတ်နိုင်တဲ့ နေ့ရက်များ

      ရွှီး…ရွှီး…ဖြန်း….

          မှန်တံခါးကို သစ်ကိုင်းများက လာရိုက်နေသည်။ သစ်ရွက်စိမ်းများ ကပ်ကျန်နေခဲ့သည်။ အားလုံးတိတ်ဆိတ်နေ၏။

          ၀ှီး…ဒိုင်း…..ဒုန်း…ဒုန်း…ဗျော…..ဗုန်း…

တိုက်ပေါ်က ဘာပြုတ်ကျသွားမှန်းမသိ။

          ၀န်းကျင်တစ်ခုလုံး မှောင်မိုက်နေသည်။ တံခါးကို ဖြည်းဖြည်းချင်း အသာလေး ဆွဲလှပ်ဖို့ပြင်ခိုက် “မလှပ်နဲ့၊ မလှပ်နဲ့” အမှောင်ထဲက အော်သံကြားတော့ လှည့်ကြည့်လိုက်စဉ် မဲမဲကြီး ငုတ်တုတ်ကြီး ထိုင်နေသူတစ်ဦး။

          တစ်ခါတစ်ခါတွင် သုံးထပ်တိုက်ကြီးတစ်ခုလုံး လှုပ်ယိုင်းခါထွက်သွားသည်။ ဘာတွေ ဖြစ်ပြီကုန်လဲ…။

          အလင်းရောင် ပျပျလေး ထွက်လာသည်။ “မိုးပါလာလို့ တော်တာ၊ နို့မဟုတ်ရင် မလွယ်ဘူး” ဦးသောဘိတဓမ္မအသံကြားရသည်။ “မိုးက လေကို ဖြတ်တောက်ပေးတယ်။ ဒါကြောင့် သက်သာတာ” သူက လောဂျစ်ကယ်ရီးစင်းထပ်ထုတ်လိုက်သည်။ ဦးသုနန္ဒ(ဖောင်းပြင်)က အားပါးတရထောက်ခံနေ သည်။ စောစောက ခေါင်မိုးပေါ်က ရေပေပါ(စည်ပိုင်း)ကြီး ပြုတ်ကျသွားတာလို့ သူက ဆိုသည်။

          ဒီဇင်ဘာ(၂၉)နေ့ကတည်းက စတင်တိုက်ခတ်နေတဲ့ သိမ်း(Thane)မုန်းတိုင်း။ ၂၉ ရက်နေ့ (၁၂) နာရီ ကျော်တာနဲ့ ပြင်းထန်းလာလေတော့၏။ အိန္ဒိယနိုင်ငံ၊ တမီလ်နာဒူးပြည်နယ်၊ ချင်နိုင်း (Chennai) မြို့၏ အရှေ့နဲ့ အရှေ့တောင်ဘက်၊ မိုင်(၃၃၀)ခန့်၊ မြန်မာနိုင်ငံ၊ ကိုကိုးကျွန်းရဲ့ အနောက်နဲ့ အနောက် တောင်ဘက်၊ မိုင်(၅၇၅)မိုင်ဝန်းကျင်၊ ပုသိမ်မြို့၊ အနောက်တောင်ဘက်၊ မိုင်(၇၂၀) ခန့် ဘင်္ဂလားပင်လယ်အော်တောင်ပိုင်းပင်လယ်ကို ဗဟိုပြုပြီး ၆ နာရီအတွင်းမှာ အနောက်-အနောက် တောင်ဘက်ကို တစ်နာရီ ၇ မိုင်နှုန်းနဲ့ ရွေ့လျားနေတဲ့ ဆိုင်ကလုန်းမုန်းတုန်း။ NRL data တွေ ထုတ်ပြန်ချက်က ၂၈ ရက်နေ့ကတည်းက စတင်တိုက်ခတ်နေတာတဲ့။ အိန္ဒိယ နေ့စဉ် သတင်းစာ ကလည်း ကြိုတင်သတိပေးပြီး ရာသီဥတုအခြေအနေကို တိတိကျကျ တွက်ချက် ဖော်ပြထားပါတယ်။ လမ်းဘေးတဲသာသာအိမ်လေးများတွင် နေထိုင်တဲ့ ဒေသခံပြည်သူတွေကို ဆေးရုံ၊ စာသင်ကျောင်းတွေမှာ နေရာချပေးထားပါတယ်။

အိန္ဒိယမိုးလေဝသနဲ့ ဇလဗေဒဌာနတို့ ပြောကြားချက်အရ ဘင်္ဂလားပင်လယ်အော်နဲ့ အိန္ဒိယသမုဒ္ဒရာကို အခြေပြုတိုက်ခတ်ခဲ့တဲ့ ဆိုင်ကလုံးမုန်တိုင်းနာမည်များအား အိန္ဒိယ၊ ဘင်္ဂလားဒေ့ရှ်၊ ပါကစ္စတန်၊ သီရိလင်္ကာ၊ မော်လဒိုက်၊ မြန်မာ၊ အိုမန်နဲ့ ထိုင်းနိုင်ငံတွေက အလှည့်ကျ နာမည်ပေးခြင်းဖြစ်ကြောင်း သိရပါတယ်။

၂၀၀၄ ခုနှစ်က စတင်အသက်ဝင်ခဲ့တဲ့ ကမ္ဘာ့မိုးလေဝသ၊ ဇလဗေဒအဖွဲ့နဲ့ ကုလသမဂ္ဂ အာရှ၊ ပစိဖိတ် စီးပွားရေးနဲ့ လူမှုရေး ကော်မရှင်တိှု့ ချမှတ်ထားတဲ့ လုပ်ထုံးလုပ်နည်းတွေအညီ ခုလို နာမည်သတ်မှတ်ခြင်းဖြစ်ပါတယ်။ နိုင်ငံရှစ်နိုင်ငံက အမည် ၆၄ ခု ပြင်ဆင်ထားပြီး အလှည့်ကျ ကြေညာတယ်။ ခု ဘင်္ဂလား ပင်လယ်အော်ဆီ ရွေ့လျားနေတဲ့ ဆိုင်ကလုံးနာမည် သိမ်း (Thane) အား မြန်မာနိုင်ငံက ပေးခဲ့တာပါ။

ပြီးခဲ့တဲ့ နှစ်များက ပေးခဲ့တဲ့ နိုင်ငံနဲ့ ဆိုင်ကလုံး နာမည်များမှာ….

•     လိုင်လာ (ပါကစ္စတန်)၊ နစ်ရှား (ဘင်္ဂလားဒေ့ရှ်) ၂၀၁၀
•     ဖျန်း (မြန်မာ) ၂၀၀၉
•     အိုင်လာ (မော်လဒိုက်) ၂၀၀၉
•     ဘီဂျလီး (အိန္ဒိယ) ၂၀၀၉
•     ရက်ရ်ှမီး (သီရိလင်္ကာ) ၂၀၀၈
•     နာဂစ် (ပါကစ္စတန်) ၂၀၀၈

          အရှင်က သီရိလင်္ကာကနေ ၂၇ ရက်နေ့မှာ အိန္ဒိယနိုင်ငံ၊ ချင်နိုင်းမြို့ကို ရောက်ရှိပါတယ်။ ၂၈ ရက် နေ့နံနက်မှာ မုန်တိုင်းသတင်းကို ဖတ်ထားပါတယ်။ အရှင့်ရဲ့သူငယ်ချင်းမိတ်ဆွေရဟန်းတော် (၈)ပါးက ချီဒမ်ဘရမ်(Chidambaram)မြို့၊ အနာမလိုင်းတက္ကသိုလ်(Annamalai Univarsity)မှာ Ph.D တန်းတက်နေကြပါတယ်။ သူတို့အတွက် စာအုပ်စာတမ်း၊ သင်္ကန်း၊ နို့မှုန့်၊ ခေါင်းရိတ်ဓား၊ လဘက်ခြောက်စတာတွေ လှူဒါန်းဖို့ အဲဒီမြို့ကို သွားမှ ဖြစ်မှာပါ။ ချင်နိုင်းကနေ ဂယာသွားဖို့ ရထားလည်း စီစဉ်ပြီးပြီ။ ဂယာကနေ မြန်မာပြည်ကို ပြန်ဖို့လေယာဉ်လက်မှတ်ကလည်း ကြိုတင်ဖြတ်ထားပြီးပြီ။ အန္တရာယ်ကို ကြောက်ပြီး မသွားရင် သူတို့လိုအပ်ချက်တွေလည်း ဆုံးရှုံးသွားနိုင်ပါတယ်။ ဒီတော့ မိမိပြုလုပ်တဲ့ ကုသိုလ် ကောင်းမှုဓမ္မအစွမ်းကိုပဲ အားကိုးပြီး  ဖြစ်ချင်ရာ ဖြစ်စေတော့ဆိုပြီး မိတ်ဆွေသူငယ်ချင်းရဟန်းတော် ဦးဓမ္မသီရိနဲ့အတူ ရထိမီနာ(Rathimeena)ဘတ်စ်ကားစီးပြီး  ၂၈ ရက်နေ့ နေ့လည် ၁ နာရီ ၅၅  မိနစ်မှာ ချင်နိုင်းမြို့ကနေ စတင်ထွက်ခဲ့ပါတယ်။ ကားခ ၂ ပါးစာ ရူးပီး(၅၀၀)ပေးရပါတယ်။ ကားဂိတ် ကို တက်စီငှားရာ ရူးပီး ၈၀၀ ကျပါတယ်။ လမ်းဘေးကားရပ်တော့ လဘက်ရည် တစ်ပါး တစ်ခွက် သောက်ရာ တစ်ခွက်ကို ၁၃ ရူးပီးကျပါတယ်။ (ချီဒမ်ဘရမ်မြို့ထဲမှာ တစ်ခွက်ကို ၆ ရူးပီးပေးရပါတယ်။) ည ၇ နာရီ ၁၅ မိနစ်မှာ သီရိနိဝဆ(Sri Nivasa) ရုပ်ရှင်ရုံ(Theater)နားမှာ ဆင်းရပါတယ်။ အရှင်ဥေယျဓမ္မ၊ အရှင်သောဘိတဓမ္မနဲ့ ဘုန်းကြီးဦးပဏ္ဍိတို့ လာကြိုကြပါတယ်။

          ၂၉ ရက်နေ့ မနက်ခင်းမှာ သူငယ်ချင်းများက သူတို့တက်ရောက်လေ့လာနေတဲ့ အနာမလိုင်း တက္ကသိုလ်ကြီးထဲကို ခေါ်သွားပါတယ်။ ဒီတက္ကသိုလ်ကြီးမှာ မြန်မာရဟန်းတော်တွေ ယခုနှစ်မှ စတင် တက်ခွင့်ရတာပါ။ အစက ၁၀ ပါးပါ။ လက်ရှိမှာတော့ ၈ ပါးပဲကျန်ပါတယ်။ မြန်မာရဟန်းတော်တွေကို မမြင်ဘူးလို့ သွားလေရာမှာ ၀ိုင်းဝိုင်းအကြည့်ခံရပါတယ်။ ဓာတ်ပုံတွဲရိုက်ချင်တဲ့သူတွေလည်း ပေါပါတယ်။ သတင်းထောက်တွေက သေချာဓာတ်ပုံရိုက်ပြီး သူတို့သတင်းစာမှာ ဖော်ပြထားပါတယ်။ အပြင်သွား ရတာလည်း ခပ်လန့်လန့်ပါပဲ။    အာရှမှာ အကြီးမားဆုံး တက္ကသိုလ်ဖြစ်တယ်လို့  သိရပါတယ်။ ကျောင်းသား၊ ကျောင်းသူပေါင်း သိန်းချီပြီး လေ့လာနေကြတာပါ။ အာဖရိကမှ နီဂရိုးကျောင်းသား၊ ကျောင်းသူတွေ (၄၀၀) လောက်လည်း  ပညာဆည်းပူးနေကြပါတယ်။ ဌာနပေါင်း (၄၉) ခုရှိပါတယ်။ မြန်မာရဟန်းတော်တွေ တက်ရောက်လေ့လာနေတဲ့ ဖီလိုဆိုဖီဌာနကို ၁၉၂၉ မှာ စတင်ဖွင့်လှစ်ခဲ့တာပါ။ ဒီတက္ကသိုလ်ကြီးကို ၁၉၂၅ ခုနှစ်က အိန္ဒိယကဗျာဆရာကြီး ရာဘင်ဒရာနတ်တဂိုး (Rabindranath Tagore)နဲ့ ဒေါက်တာဆာရေပလ္လိရာ ဒကရစ်ရှနန် (Sarvepalli Radhakrishnan) တို့တည်ထောင်ခဲ့တာပါ။

          လေ့လာလို့မဆုံးခင်မှာပဲ မုန်တိုင်းကြောင့် ကျောင်းတွေ ပိတ်နေပါပြီ။ နောက်ကြနေတာမို့ ဓာတ်ပုံလည်း သေချာမှတ်တမ်းမတင်နိုင်တော့ပါဘူး။ မုန်းတိုင်းက အစပြုနေပါပြီ။ ညရောက်တော့ ဖြည်းဖြည်းချင်းနဲ့ တိုက်ခတ်ပြီး ည ၁၂ နာရီကျော်တာနဲ့ ကြမ်းတော့တာပါပဲ။ ၃၀ ရက်နေ့ နံနက် ၇ နာရီလောက်မှာ စာရေးသူတို့နေတဲ့ သုံးထပ်တိုက်၊ အပေါ်ဆုံးထပ်ကို တမီးလ်ဟိန္ဒူကလေးငယ်များ ပြေးတက်လာပြီး စာရေးသူတို့အခြေအနေကို လာကြည့်ပါတယ်။ အရှင်တို့ကိုတွေ့တော့ ၀မ်းသာ နေကြပါတယ်။ တိုက်ပေါ်က ရေတွေကိုလည်း ခပ်ထုတ်ပေးပါတယ်။ စမူဆာများလည်း လာပို့ပေးပါတယ်။ ဘာသာမတူသော်လည်း သူတို့ခေါင်းထဲမှာ အစွဲအလမ်းမပြင်းထန်သေးတော့ ဖြူစင်မှုနဲ့ သန့်ရှင်းတဲ့ ခင်မင်မှုလေးတွေကို တွေ့ရပါတယ်။ စိတ်ထဲ တော်တော်ကြည်နူးမိပါတယ်။

မုန်းတိုင်းလည်း  ပြီးသွားပါပြီ။ အိန္ဒိယနိုင်ငံတောင်ပိုင်း၊ ပွန်ဒီချယ်ရီကမ်းခြေနဲ့ တမီလ်နာဒူးပြည်နယ်ကမ်းခြေမှာ လူ ၃၅ ဦး သေဆုံးခဲ့ကြောင်း၊ လမ်းတွေ ပိတ်ဆို့သွားကြောင်း စနေနေ့ထုတ် Times of India သတင်းစာမှာ ဖော်ပြထားပါတယ်။ လင်္ကာက သူငယ်ချင်းတွေကလည်း မေးလ်ကနေ အဆင်ပြေ-မပြေမေးမြန်းရင်း စိုးရိမ်ပူပန်နေကြပါတယ်။ အရှင်တို့အဖို့ ဘေးရန်ကင်းကွာ ချမ်းသာစွာနဲ့ ခရီးစဉ်ဖြောင့်ဖြူးသာယာခဲ့ပါပြီ။ ခုလို ခရီးစဉ် ဖြောင့်ဖြူးတာဟာ ချင်နိုင်းမှာ နှစ်(၃၀)နီးပါးလောက်နေထိုင်နေတဲ့ မြန်မာပြည်ဖွား၊ ဦးချင်းယားနဲ့ ဒကာမကြီးဒေါ်စိန်ထွေးတို့မိသားစုရဲ့ စီမံပေးမှုကြောင့်ပါ။ သူတို့မိသားစုက စေတနာလွန်စွာ ဖြောင့်စင်းပါတယ်။ သူတို့ဆီရောက်လာတဲ့ မြန်မာရဟန်းတော်မှန်သမျှကို မငြီးမငြူပဲ စိတ်ရှည်လက်ရှည်နဲ့ ကူညီ ပေးလေ့ရှိပါတယ်။ အိန္ဒိယမှာ ပညာသင်နေတဲ့ ရဟန်းတော်များ၊ အိန္ဒိယနဲ့ပတ်သက်ဘူးတဲ့ ဆရာတော်များအဖို့ သူတို့မိသားစုရဲ့ အကူအညီလွတ်သူခပ်ရှားရှားပါပဲ။ ချင်နိုင်းတက္ကသိုလ်တစ်ခုမှာ ဒေါက်တာဘွဲ့အတွက် ပညာသင်နေတဲ့ ဦးသြဘာသနဲ့ ဦးနန္ဒသာရတို့ကလည်း စေတနာအပြည့်အ၀နဲ့ စာရေးသူတို့ရဲ့လိုအပ်ချက်တွေကို စေတနာအပြည့်အ၀နဲ့ ကူညီပေးကြပါတယ်။

သူတို့စေတနာ၊ သူတို့မေတ္တာတွေနဲ့ ကုသိုလ်ကောင်းမှုဓမ္မစွမ်းအင်တွေကြောင့် ဘေးရန်တွေ ကနေ လွတ်မြောက်ခဲ့ပါတယ်။ ဒါပေမယ့် အဲဒီနေ့ရက်တွေမှာ ဟာသမထုတ်နိုင်တာကတော့ သေချာ ပါတယ်။ သြော် ဟာသမထုတ်နိုင်တဲ့ နေ့များပါတကား……။

         

အကိုး      

1.86th Session of Indian Philosophical Congress(IPC) လက်ကမ်းစာရွက်စာတမ်းများ။

2.28.Dec.2011,India Daily News Paper,

3.http://www.mizzimaburmese.com/news/regional/8832--thane--.htm(31.12.2011)

 

အိန္ဒိယနိုင်ငံ၊ တမီလ်နာဒူးပြည်နယ်၊ ချီဒမ်ဘရမ်(Chidambaram)မြို့မှ အာရှရဲ့အကြီးမားဆုံး အနာမလိုင်းတက္ကသိုလ်ကြီး

 ရေသတ္တ၀ါများစွာထားတဲ့ ပြတိုက်ကြီး

 တက္ကသိုလ်က တမီးလ်ကျောင်းသားများနဲ့အတူ

စပ်မိစပ်ရာ ဟာသများ(၅)

 အလွန်းလို့ ချပစ်တာ

စာရေးသူ မန္တလေးမြို့၊ မစိုးရိမ်တိုက်သစ်မှာ စာသင်နေတုန်းကပေါ့။ တစ်ညနေခင်းမှာ စာသင်သားကိုယ်တော်တွေက ဆရာတော် ဦးသီရိန်  (သီရိန္ဒာ ဘိဝံသ)ရဲ့ ကျောင်းနောက်ဖေး ရေချိုးအုတ်ကန်မှာ ခပ်ကြီးကြီး ပလပ်စတစ်ရေဆွဲပုံးတွေနဲ့ တဘွမ်းဘွမ်းရေးချိုးနေရာ ဆရာတော်က ရေကို မချွေတာလို့ ရိုက်မယ်ဆိုပြီး ကျောင်းပေါ်က ဆင်းလာပါတယ်။

          ရေကန်နားလည်းရောက်ရော ဆရာတော်က ရေတဘွမ်းဘွမ်းနဲ့ ချိုးနေသူတွေ ကြားထဲမှာ တစ်ပါးတည်း နို့ဆီဘူးသာသာခွက်လေးနဲ့ ရေချိုးနေတဲ့ ဦးကုသလဆိုတဲ့ ကိုယ်တော်ကို တွေ့သွားပါတယ်။ ဆရာတော်က အဲဒီခွက်သေးသေးနဲ့ ချိုးနေတဲ့ ကိုယ်တော် တစ်ပါးတည်းကိုပဲ ရွေးပြီး ရိုက်သွားပါတယ်။

          ညရောက်တော့ ဘုရားရှိခိုးအပြီး ဆရာတော်ပေးလိုက်တဲ့ သြ၀ါဒက “တပည့်တော် ညနေက ကိုယ်တော်တွေ ရေကို မချွေတာဘူးဆိုပြီး ရိုက်မလို့ သွားတာ၊ ကန်နားရောက်တော့ ဦးကုသလက သူများတွေ ခွက်ကြီးကြီးနဲ့ချိုးနေတဲ့အချိန် သူက ခွက်သေးသေးနဲ့ ချိုးနေတော့ ဒီလောက်တောင် အလှချည်းလားဆိုပြီး သူ့ကိုပဲ အလွန်းလို့ ချပစ်ခဲ့တယ်” လို့ မိန့်လိုက်ရာ စာသင်သားတွေမှာ တဝေါဝေါနဲ့ ပွဲကျသွားပါတော့တယ်။

ကိုယ့်ရှူးကိုယ့်ပတ်

အညာဒေသေ ရွာတစ်ရွာမှာ ကျောင်းသား၊ ကိုရင်တွေနဲ့ စည်ကားနေတဲ့ ဘုန်းတော် ကြီးကျောင်းတစ်ကျောင်းရှိပါတယ်။ ကျောင်းထိုင်ဆရာတော်က် ကဗျာ၊ လင်္ကာစတာတွေကို လွန်စွာဝါသနာကြီးပါတယ်။ ကျောင်းနံရံတွေမှာလည်း ကဗျာအတိုအစလေးများကို ကပ်ထား လေ့ရှိပါတယ်။ ကြာတော့ ကျောင်းသား၊ ကိုရင်တွေလည်း ဆရာတော့်ဓာတ်ကူးသွားကာ သူတို့စိတ်ထဲပေါ်လာတဲ့ ကဗျာ၊ ကာရံအတိုအထွာတွေကို တွေ့တဲ့နေရာ ရေးလိုက်၊ ပါးစပ်က ဆိုလိုက်နဲ့ ဖြစ်ကုန်ပါတော့တယ်။

တစ်နေ့မှာ ကျောင်းဝိုင်းကျယ်ကြီးကို သန့်ရှင်းရေးလုပ်နေခိုက် ကျောင်းသားငယ် တစ်ဦးက “ဒို့ကျောင်းတော်ကြီး သာသာယာယာ” လို့ ပါးစပ်ထဲပေါ်ရာကို ဆိုလိုက်ရာ ဘုန်းတော်ကြီးက ပြူတင်းပေါက်က ကြည့်နေရင်း သဘောကျသွားကာ “ဟဲ့..ကျောင်းသား၊ ဆက်ဆိုစမ်းပါဦး” ဟု လှမ်းအော်လိုက်ပါတယ်။ ကျောင်းသားကလည်း ဆက်မဆိုတတ်လို့ တွန့်ဆုတ်ဆုတ်ဖြစ်နေရာ ဘုန်းတော်ကြီးက ဆက်ဆိုဖို့ ထပ်အော်လိုက်ပြန်ပါတယ်။

 ကျောင်းသားကလည်း ကြောက်ကြောက်နဲ့ “ဘုန်းတော်ကြီးလည်း ပျံတော်မူတော့မှာ” လို့ ဆက်ဆိုချလိုက်ရာ ဘုန်းတော်ကြီးမှာ အရှိုက်ထိသွားကာ မျက်နှာရွံ့မဲ့မဲ့ဖြစ်ပြီး ရိုက်ရခက်၊ ငေါက်ရခက်မို့ ပြူတင်းပေါက်ကို ဒိုင်းကနဲ ဆောင့်ပိတ်ချလိုက်ပါတော့တယ်။

ရယ်စရာ မဟုတ်တဲ့ ဟာသ

 

တစ်ခါက နာမည်ကြီးကျောင်းတိုက်ကြီးတစ်ခုမှာ စာချဆရာတော်ကြီးက စာလိုက်တဲ့ တပည့်စာသင်သားများ ပျင်းမှာစိုးပြီး စာချရင်း ရယ်စရာဟာသများပြောပြပါတယ်။ ဒါပေမယ့် ဆရာတော့်ဟာသတွေက ခြောက်ကပ်ကပ်နဲ့ မရယ်ရပါဘူး။ တပည့်များက ပျင်းပျင်းရိရိနဲ့ ပြူးကြောင်ပြီး ကြည့်နေတော့ ဆရာတော်က “ဟဲ့ ကောင်တွေ၊ ငါက ရယ်စရာ ပြောနေတာ၊ ရယ်ကြလေ” လို့ မိန့်လိုက်ရာ ထိုအခါမှပဲ ရယ်စရာမဟုတ်ဘဲနဲ့ တဟဲဟဲ ရယ်လိုက်ရပါတော့တယ်။

 ဘယ်သူမှ နားမလည်တဲ့ စကား

စာရေးသူ ချင်းတောင်ပေါ် သာသနာပြုနေစဉ်ကပေ့ါ။ တစ်ချိန်မှာ မြေမြန့်ကို ကိစ္စ တစ်ခုနဲ့ ပြန်ဆင်းပါတယ်။ အဲဒီတုန်းက မိုးတွေကရွာ၊ ချောင်းတွေကကြီးပြီး ခရီးတော်တော် ဖင့်နေပါတယ်။ မိုးသဲသဲ ညမှောင်မှောင်ထဲ စိုးတထိတ်ထိတ်နဲ့ ခြေကျင်ခရီးနှင်ရင်း အိမ်ခြေ ၅ အိမ်လောက်ရှိတဲ့ ရွာလေးတစ်ရွာကို ည ၁၂ နာရီဝန်းကျင်လောက်မှာ ရောက်သွားပါတယ်။ အဲဒီရွာလေးထဲ ၀င်ခါစမှာပဲ ခွေးတွေအများကြီးထွက်လာပြီး ကျယ်လောင်စွာမာန်ဖီဟောင်ကြ ရင်း စာရေးသူကို ၀ိုင်းထားကြပါတယ်။ စာရေးသူအဖို့ လေးလံလှတဲ့ ကျောပိုးအိပ်နဲ့ တစ်နေကုန် မိုးတောထဲ လျှောက်ခဲ့ရတဲ့ဒဏ်တွေကြောင့် အတော်ကြီးမောပန်းနွမ်းနယ်နေပါပြီ။ ခုခံဖို့ မလွယ်တော့ပါဘူး။

          ထိုစဉ် လူရွယ်တစ်ယောက် ရောက်လာပြီး ခွေးတွေကို မောင်းထုတ်လိုက်ပါတယ်။ ပြီးတော့ ထိခြင်းငါးပါးနဲ့ ကျကျနန ရှိခိုးရင်း “ခုလို ဝေးလံခေါင်သီတဲ့ တောတောင်ကြီးထဲမှာ အရှင်ဘုရားကို ဖူးတွေ့ရတာ ရှားပါးတဲ့ အခွင့်အရေးတစ်ခုပါပဲ…ဘုရား”တဲ့။ 

          အရှင်လည်း မြန်မာစကားကို ပီပီသသနဲ့ ကျွမ်းကျင်စွာပြောဆိုလိုက်တဲ့ လူငယ့်စကား ကြောင့် အံ့သြ၀မ်းသာဖြစ်မိပါတယ်။ သူက ရိပ်မိဟန်တူတယ်။ ချင်ချင်းပဲ...“တပည့်တော် ဗမာတစ်ယောက်ပါ ဘုရား။ တစ်ချိန်က အရှင်ဘုရားလိုပဲ သာသနာပြုရဟန်းတစ်ပါးပါ။ ဒီမှာ အိမ်ထောင်ကျတာ ၂ နှစ်ရှိပါပြီဘုရား..။ ခုလောလောဆယ် အရှင်ဘုရားကို အရေးကြီးတဲ့ စကားတစ်ခွန်းလောက် ပြောချင်လို့ပါ။ ဒီစကားကို ဒီအရပ်မှာ ဘယ်သူမှ နားလည်မှာ မဟုတ် လို့ နားမထောင်ခြင်လည်း သည်းခံပြီး နားထောင်ပေးပါ ဘုရား..”လို့ ခွင့်တောင်းပြန်ရာ..

          “မောင်ရင် ပြောစရာရှိရင် မြန်မြန်ပြောကွာ၊ ငါလည်း ပန်းလည်းပန်း ချမ်းလည်းချမ်းနေပြီ”လို့ ပြောရင်း ခွင့်ပေးလိုက်ရာ…သူတအားပြောချင်နေတဲ့ အရေးကြီးပြီး ဘယ်သူမှ နားလည်မှာ မဟုတ်တဲ့ စကားကတော့ “အရှင်ဘုရား ခု မန်ချက်နိုင်သွားပြီဘုရား…”တဲ့။

လွဲချက်ကယ် နာ

ချင်းတောင်ပေါ် သာသနာပြုနေစဉ်က ဖြစ်ရပ်လေးပါ။ သာသနာပြုကိုယ်တော် တစ်ပါးက ချင်းလူငယ်တွေကို ရဟန်းသံဃာနဲ့ ဆက်ဆံတဲ့အခါ တစ်ခုခုပြောဆိုမှားသွားရင် “ကန်တော့၊ ကန်တော့” လို့ တောင်းပန်ရန်၊ အလှူဒါနလုပ်တဲ့အခါ..တရားနာတဲ့အခါ “သာဓု၊ သာဓု” လို့ ခေါ်ဆိုရန် သင်ပေးထားလိုက်ပါတယ်။

          တစ်ချိန်မှာ ရေတာပိုင်နဲ့ မီးအားထုတ်ဖို့ သာသနာပြုကိုယ်တော်က ပခုက္ကူဆင်းပြီး ရေပိုက်၊ ဒိုင်နမိုဝယ်ရန်သွားရင်း သူ့ရဲ့တပည့်လူငယ်တစ်ဦးကို ကပ္ပိယအဖြစ် ခေါ်သွားပါတယ်။ ကိုယ်တော်က ကားအတွင်းက စီးခွင့်ရပြီး လူရွယ်က ခေါ်မိုးပေါ်က စီးဖို့နေရာရပါတယ်။ ပခုက္ကူလည်းရောက်ရော လူငယ်က ကားခေါင်မိုးပေါ်ကနေ အောက်ဆင်းခိုက် မမျှော်လင့်ဘဲ သူ့ဆရာကိုယ်တော်ရဲ့ခေါင်းကို ခြေနဲ့ကန်မိသွားပါတယ်။ အဲဒီအချိန် ထိုချင်းလူငယ်က အသံခပ်လေးလေးနဲ့ လွဲမှားပြီးတောင်းပန်လိုက်ပုံက.. “သာ…ဓု၊ သာ….ဓု…သာဓု” တဲ့။

          ဘေးက ခရီးသည်တွေ တခွီးခွီးနဲ့ အူတက်နေသလောက် ထိုကိုယ်တော်အဖို့တော့ စိတ်တိုရခက်၊ ရယ်ရခက်နဲ့ ခြေမကိုင်မိ၊ လက်မကိုင်မိဖြစ်သွားပါလေရော။

စပ်မိစပ်ရာ ဟာသများ(၄)

စူဠသောတာပန်တဲ့ 

  

စာရေးသူတို့ နယ်ဘက်မှာ တရားဓမ္မလွန်စွာလိုက်စားတဲ့ ဒကာကြီးတစ်ယောက်ရှိပါတယ်။ သူက အဘိဓမ္မာနဲ့ ၀ိပဿနာတွေ အထူးလေ့လာလိုက်စားထားတော့ တရားသင်တန်းတွေလည်း  ပြပေးနိုင်ပါတယ်။ ကြာတော့ တရားနဲ့ပဲ မွေ့လျော်မှုများလာပြီး စိတ်လည်း တည်ငြိမ်လာပါတယ်။ အကုသိုလ်စိတ်တွေ အဖြစ်နည်းလာတော့သူကစိတ်ကြီးဝင်လာပါတယ်။

          

 တစ်နေ့ ရွာဦးကျောင်းဆရာတော်ကြီးထံတရားဆွေးနွေးဖို့ ရောက်သွားပါတယ်။ စိတ်ကြီးဝင်နေသူ ဆိုတော့ ဘုန်းကြီးကိုရှိမခိုးဘဲ ပမာမခန့်ထိုင်လိုက်ပါတယ်။ ဘုန်းတော်ကြီးက ကွမ်းစားဖို့ ကွမ်းညှပ်နေရင်း မျက်စိထဲဒေါင့်မကျိုးတာနဲ့ “ဒကာတော်၊ ဘာလို့ ရှိမခိုးတာလဲ” လို့ မေးလိုက်ရာ….

           

ထိုဘကြီးက “တပည့်တော် စူဠသောတာပန်ပါဘုရား၊ ဒါကြောင့်မို့ အရှင်ဘုရားလို ပုထုဇဉ်တစ်ပါးကို ရှိမခိုးနိုင်ဘူး…ဘုရား” လို့ လျှောက်လိုက်ရာ ဘုန်းတော်ကြီးက စိတ်တိုပြီး “ဘာ… စူဠသောတာပန်လဲကွ၊ မင်းထက်မြင့်တဲ့ သောတာပန်အဆင့်ရှိတဲ့ သိကြားမင်းကတောင် ဒီနေ့ဝတ်တဲ့ ပုထုဇဉ်ကိုရင်လေးကို ရှိခိုးသေးတယ်ကွ..” လို့ ငေါက်ပစ်ရင်း ကွမ်းညှပ်နဲ့ ထိပ်ပစ်ချရာ အနှီ စူဠသောတာပန်ကြီးလည်း နဖူးကို နာနာပွတ်ရင်း ထပြေးပါလေရော……။

ငါစွဲပြုတ်ရင် သောတာပန်

 

 

အထက်မြန်မာပြည်၊ ရွှေဘိုနားက ဒကာတစ်ယောက်တဲ့။ တရားတွေ လေ့လာလိုက်စား နေသူပါ။ တရားပြဆရာတော်က “ငါ”ဆိုတဲ့ အစွဲကိုခွာနိုင်ရင် သောတာပန်ဖြစ်ပြီလို့ ရှင်းပြလိုက်ရာ ထိုဒကာတော်မောင်က တရားပွဲပြီးတာနဲ့ ချက်ချင်းအိမ်ပြန်သွားပါတယ်။ ညမှောင်မှောင်ထဲ အိမ်ရှေ့ရောက်တော့ အိမ်တံခါးကို ထုလိုက်ပါတယ်။ သူ့အိမ်ရှင်မ ဘယ်သူလဲ..လို့ မေးလိုက်တယ်။ သူက မဖြေဘူး။ နောက်ထပ်မေးတယ်။ ထိုနည်း၎င်းပါပဲ။ မဖြေပါဘူး။

သုံးခါမြောက်လည်းရောက်ရော အိမ်ရှင်မကတံခါးဖွင့်ပြီး “ရှင်..ဘယ်သူလဲ၊ မေးနေတာ မကြားဘူးလား..”လို့ စိတ်တိုတိုနဲ့အော်ချလိုက်ပါတယ်။  “ငါ…စွဲပြုတ်ရင် သောတာပန်ဖြစ်ပြီ” လို့ သူက နှလုံးသွင်းနေတာဆိုတော့ “ဒို့ပါ ဒို့ပါ”လို့ ဖြေလိုက်တယ်။ ငါစွဲပြုတ်အောင် ငါဆိုတဲ့ အသုံး အနှုံးကို ရှောင်ကြဉ်ပြီး ဖြေလိုက်ခြင်းဖြစ်ပါတယ်။ 

မိန်းမက သူ့ယောင်္ကျားမှန်းလည်းသိရော စိတ်မရှည်တော့ဘဲ “ဘယ်ကဒို့လဲ.. စကားကိုရှင်းအောင် ပြောတာမဟုတ်ဘူး” လို့အော်ဟစ်ပြောဆိုရင်း ပါးဆွဲချလိုက် တော့မှ “ငါပါကွ မိန်းမရ” လို့ ပြန်အော်ရင်း တွေးရုံသက်သက်နဲ့ဖြစ်လာတဲ့ သောတာပန်ကြီးလည်း  “ငါ” ပြန်စွဲကာ ချက်ချင်း ပုထုဇဉ်အဆင့်လျောကြပြီး ကြမ်းပြင်ပေါ်လဲကျသွားပါတော့တယ်။

အနာဂါမ် ဆရာပု

တစ်ခါက မုံရွာဘက်မှာ အမြဲနီးပါး တရားအားထုတ်နေလေ့ရှိတဲ့ ဆရာပုဆိုတဲ့လူတစ်ဦး ရှိတယ်ဆိုပဲ။ သူက ဒေါသမဖြစ်သလောက်နီးပါးပါပဲ။ ဒါနဲ့ အနာဂါမ်ဆိုတာဒေါသမရှိဘူးလို့ တွေးမိပြီး သူ့အိမ်ရှေ့မှာ “အနာဂါမ် ဆရာပု” ဆိုပြီး ဆိုင်းဘုတ်ချိတ်ထားလိုက်ပါတယ်။

          ဒါနဲ့ လူငယ်တွေက ဒေါသရှိ..မရှိ စမ်းသပ်ချင်တာနဲ့ ညရောက်တော့ ဆရာပုအိမ်ကို ခဲနဲ့ဝိုင်းပေါက်ချလိုက်ရာ နောက်နေ့မနက်လည်းရောက်ရော ဆိုင်းဘုတ်က စာတန်းမှာ ချက်ချင်းပြောင်းသွား ပါတော့တယ်။

          စာတန်းပြောင်းသွားပုံက “သကဒါဂါမ် ဆရာပု”..တဲ့။

          ဆိုင်းဘုတ်က ပြောင်းသွားတဲ့စာတန်းကို ကြည့်ပြီး လူငယ်တွေက“သြော် သကဒါဂါမ်ဆိုတော့ ဒေါသရှိသေးတယ်ပေါ့”..လို့ နားလည်သွားကြရှာသတဲ့။

ထူးဆန်းတဲ့ ရဟန္တာ 

တစ်ခါက မန္တလေးနယ်ထဲမှာ ရဟန္တာ..ရဟန္တာဆိုပြီး လူတွေ ကြိတ်ကြိတ်တိုး သွားရောက် ဖူးမျှော်ကြပါတယ်။ စာတတ်ပေတတ်ဆရာတော်တွေ သွားရောက်စစ်ဆေးတော့ ရဟန္တာလို့သမုတ် ခံရတဲ့ ဆရာတော်က ရိုးသားစွာနဲ့ “တပည့်တော် ရဟန္တာ မဟုတ်ပါဘူး..ဘုရား”လို့ ပွင်းလင်းစွာ လျှောက်ထားသတဲ့။
          ဒါဆို အရှင်ဘုရား ဘာဖြစ်လို့ ရဟန္တာဆိုပြီး နာမည်ကြီးတာလဲ..လို့ ဆရာတော်ကြီးတွေက စစ်ဆေးတော့ ထိုဆရာတော် လျှောက်ထားပုံက…

          “တပည့်တော် လူနာမည်က ငတာပါ..ဘုရား။ ဖိုးသူတော်ဖြစ်တော့ ဖိုးတာလို့ ခေါ်ခံရတယ်။ ကိုရင်ဖြစ်တော့ ကိုရင်တာဖြစ်ပြီး ရဟန်းလည်းဖြစ်ရော ရဟန်းတာ..လို့ အခေါ်ခံရတာပါဘုရား..”တဲ့။

နိဗ္ဗာန်ရောက်သူ ၄ ဦး

 

တစ်ခါက မန္တလေးတောင်ပေါ်တက်ပြီး နိုင်ငံခြားသားတွေနဲ့ အင်္ဂလိပ်စကားပြောလေ့ကျင့်တဲ့ ကိုယ်တော်လေးတစ်ပါးရှိပါတယ်။ ဘာသာရေးစိတ်ဝင်စားတဲ့ တိုးရစ်တစ်ယောက်က ထိုကိုယ်တော် လေးအား “အရှင်ဘုရားတို့ ဗုဒ္ဓဘာသာမှာ နိဗ္ဗာန်ဆိုတာ လူသိများတယ်။ ခုအဲဒီနိဗ္ဗာန်ကို ရောက်တဲ့သူ ဘယ်နှစ်ဦးရှိပြီလဲ..”လို့ မေးလိုက်ရာ ကိုယ်တော်လေးက အင်္ဂလိပ်အသံထွက်ကလည်း တကယ် နားမယဉ်သေးတော့ နိဗ္ဗာန်ကို မျက်မှောက်အာရုံပြုနိုင်တဲ့ ပုဂ္ဂိုလ်တွေနဲ့လွဲပြီး ၄ ယောက်လို့ ရုတ်တရက် မှားဖြေလိုက်မိပါတယ်။ သူက သောတာပန်၊ သကဒါဂါမ်၊ အနာဂါမ်နဲ့ ရဟန္တာပုဂ္ဂိုလ်တွေကို ရည်ရွယ်ပြီး ဖြေလိုက်မိတာပါ။

တိုးရစ်ကမျက်နှာရှုံ့မဲ့ကာ…

          “အိုး တော်ပြီ၊ တော်ပြီ၊ အရှင်ဘုရားတို့ နိဗ္ဗာန်က လူနည်းနည်းပဲ လက်ခံတာ၊ ဒါကြောင့် သူတရားအားမထုတ်ချင်တော့ဘူး” လို့ ပြောပြီး စိတ်ပျက်ပျက်နဲ့ ပြန်သွားရှာသတဲ့…။

စပ်မိစပ်ရာ ဟာသများ (၃)

  လေပေါတယ်ဆိုတာ ဒါမျိုး

ကိုယ်တော်တစ်ပါး။ တွေ့ရာ မြင်ရာကို ဘာမှအလွတ်မပေးဘဲ အကုန်လိုက်ပြောချင်သူ။ စကားကိုလည်း

အကျအနကောက်ပြောတတ်သူ။ မိုးရေထဲကြေမွနေတဲ့ နွားခြေးတွေကို မြင်တော့ သူက “ယူကြုံးမရဆိုတာ..ဒါပဲ” တဲ့။
ကားချင်းတိုက်လို့ မှန်တွေ ကွဲတာမြင်တော့ “ကြေကွဲတယ်ဆိုတာ ဒါမျိုး” လို့လုပ်ပြန်ရော။
ဆောင်းရာသီ၊ နှင်းတွေကျ၊ လေတွေတိုက်တော့ “ဒါမျိုးကို အေးချမ်းတယ် ခေါ်တာ” လို့ အဋ္ဌကထာဖွင့်ပြန်ရော။
သူနဲ့ ခရီးတစ်ခုသွားရင်း ကားတွေ လေဖြည့်တဲ့နေရာရောက်တော့ ကားဘီးကပေါက်၊ မိုးတွေကရွာ၊ လေတွေတိုက်၊ ဖားတွေကအော်။ တော်တော့်ကို ဆူညံပွတ်လောရိုက်နေတဲ့နေရာပါပဲ။ ဒါနဲ့ အခြားကိုယ်တော်တစ်ပါးက ကိုလေပေါကို ရွဲ့ပြီး “လေပေါတယ်ဆိုတာ ဒါမျိုးကွ”လို့ ဦးအောင် ဋီကာဖွင့်ချလိုက်ရာ တွေ့ကရာရှစ်သောင်းကို မနားတမ်းပြောတတ်တဲ့ ကိုလေပေါခမျာ ဒီတစ်ခါတော့ ဘာမှ မပြောနိုင်တော့ဘဲ မျက်လုံး၊ မျက်ဆံပြူးပြီး ထိုင်နေရင်း ငုတ်တုတ်မေ့သွားပါလေရော…..။

အပြည့်စုံဆုံး ဒိုင်ယာရီ

မန္တလေး၊ သာသနာ့တက္ကသိုလ်မှာ ပညာဆည်းပူးနေတုန်းကပေါ့။ ဒိုင်ယာရီမပြတ်ရေးလေ့ရှိတဲ့ ကိုယ်တော်လေးတစ်ပါးရှိတယ်ဆိုပဲ။ သူက နေ့စဉ်ဖြစ်ပျက်သမျှကို ဘာမှ မကျန်အောင် ရေးလေ့ရှိ တယ်တဲ့။
အဲဒါ ဖြစ်နိုင်ပါတယ်။ ဘာကြောင့်လည်းဆိုတော့ သူ့ဒိုင်ယာရီမှာ ဘာမှ ရေးစရာမရှိတာကို တောင် ဖြစ်အောင်ရေးမှတ်ထားပုံကို ကိုယ်တော်တစ်ပါးက ဖောက်သည်ချပါတယ်။ ဘာမှ ရေးမှတ်စရာမရှိတာကို ရေးမှတ်ထားပုံက…”ဒီနေ့ ဘာမှ ရေးစရာမရှိ၊ ငရုပ်ပင် ရေလောင်း၊ ပေါင်းထိုး၊ မြက်ရိတ်၊ အိပ်” တဲ့..။

လိုက်ပွဲလေးကမှ ကောင်းတာ

အနေအထိုင် အတော်ရိုးအေးပြီး သိက္ခာ၊ သမာဓိရှိတဲ့ ဆရာတော်ကြီးတစ်ပါး။ သူက ဥပုသ် နေ့ည ဘုရားဝတ်တက်ပြီးရင် တပည့်စာသင်သားတွေကို လိမ္မာရေးခြားရှိအောင်၊ အသိဥာဏ် ဗဟုသုတရှိအောင် သြ၀ါဒပေးလေ့ရှိပါတယ်။ သူ့ကိုယ်တွေ့တွေကိုလည်း မကြာခဏ ပြောပြလေ့ ရှိပါတယ်။ သူငယ်ငယ်က မန္တလေးမှာ စာသင်နေစဉ် ပြင်ပဗဟုသုတရှိအောင်ဆိုပြီး တစ်နေ့မှာ အအေးဆိုင်တစ်ဆိုင်ကို သွားထိုင်တာတဲ့။

တစ်ခါမှ ဆိုင်ထိုင်ဘူးတာမဟုတ်တော့ ဘာမှာလို့ မှာရမှန်း မသိပါဘူး။ ဒါနဲ့ ဟိုဟိုဒီဒီ လျောက်ကြည့်တော့ နံရံက ကြော်ငြာဆိုင်းဘုတ်ကို တွေ့လိုက်ပါတယ်။ “ဖာလူဒါတစ်ခွက် ၅၀ ပြား၊ ရွှေရင်အေးတစ်ခွက်..၄၀..ပြား” စသည်ပေါ့။ ဆရာတော်လောင်းလျာ ဦးဇင်းလေးက “ဖာလူဒါ တစ်ခွက်”လို့ မှာလိုက်ပါတယ်။ ဆိုင်ကအမောပြေ ရေခဲရေတစ်ခွက် အရင်လာချပေးပါတယ်။ ဦးဇင်းလေးက ရေးအေးအေးလေးကို ဖြည်းဖြည်းချင်း အရသာခံပြီး သောက်ကြည့်နေပါတယ်။

ထိုစဉ် အဖော်ရဟန်းတော်တွေ ရောက်လာပြီး “စာဝါသံချောင်း ခေါက်တော့မယ်၊ နောက်ကျလိမ့်မယ်၊ သွားကြရအောင်”ဆိုပြီး ခေါ်သွားပါတယ်။ ဦးဇင်းလေးက ပြား ၅၀ ကို စားပွဲပေါ်တင်ပြီး ဆိုင်ထဲကထွက်မယ်ပြင်ခိုက် ဖာလူဒါအစစ် ရောက်လာပါတယ်။
ဦးဇင်းလေးက နောက်ကျမှာ စိုးတာနဲ့ နဲနဲမြည်းကြည့်ပြီး ခပ်သုတ်သုတ် လိုက်သွားပါတယ်။

လမ်းရောက်တော့ ဦးဇင်းလေး ပြောလိုက်ပုံက “တပည့်တော် ဖာလူဒါသောက်တာ ဘာမှ အရသာမရှိဘူး၊ ရွာက ရေတိုင်းပဲ။ လိုက်ပွဲလေးကမှ အရသာရှိတာ” တဲ့။

 ငါ့သားကို ထမင်းငတ်အောင် လုပ်တဲ့ခေတ်

တစ်ခါက တောမြို့တစ်မြို့မှာ သားဖ ၂ ယောက်ထမင်းအတူစားနေကြပါတယ်။ သားဖြစ်သူရဲ့ ဆံပင်စတိုင်က မျက်စိတစ်ဖက်ပေါ် ၀ဲကျနေတဲ့ဟန်ပါ။ ထမင်းကို ခေါင်းငုံ့စားနေတော့ သူ့ဆံပင်က မျက်စိတစ်ဖက်ပေါ် လာလာပြီး အုပ်နေပါတယ်။ ဒါကို သူက ခေါင်းကို ဆတ်ခနဲခါခါပစ်ပြီး ဆံပင်ကို လှန်လှန်တင်နေရတာဆိုတော့ ထမင်းကောင်းကောင်းစားလို့   မရတော့ပါဘူး။

    ဖအေဖြစ်သူက “မင်းဆံပင်ကြီးကလည်း နေရထိုင်ရ၊ စားရသောက်ရတာ အတော့်ကို အဆင် မပြေဘူး။ ညှပ်ပစ်စမ်းကွာ” လို့ ပြောတော့ သားဖြစ်သူက… “ဟာ အဖေကလည်း ဘာမှမသိဘဲနဲ့၊ ဒါ ခေတ်စတိုင်ဗျ..”လို့ ပြန်ပြောလိုက်ရာ ဖအေက ဒေါကန်ပြီး….
    “တောက်…ခေတ်ကိုက ငါ့သားကို ထမင်းငတ်အောင် လုပ်တဲ့ခေတ်၊ အလကားခေတ်၊ ထွီ..” ဆိုပြီး စိတ်တိုတိုနဲ့ ထမင်းဝိုင်းကနေ ထသွားပါတော့တယ်။

အမှန်ကန်ဆုံး ဒိုင်ယာရီ

   မန္တလေးမြို့၊ သာသနာ့တက္ကသိုလ်တက်တုန်းကပါ။ သူငယ်ချင်းကိုယ်တော်တစ်ပါးရှိတယ်။ သူက ဒိုင်ယာရီ အမြဲရေးမှတ်လေ့ရှိပါတယ်။ တစ်နေ့မှာ သူမရှိခိုက် သူငယ်ချင်းတွေ သူ့နေရာ ရောက်လာပါတယ်။ အချင်းချင်းကလည်း ပြောမနာ၊ ဆိုမနာဆိုတော့ သူ့ဒိုင်ယာရီလေးကို ခပ်ဖြန်းဖြန်း ကောက်လှန်ဖတ်မိလိုက်ပါတယ်။

သူ့ပေါ် တစ်ခါမှ စိတ်မဆိုးဘူးတဲ့ သူငယ်ချင်းတွေက ဒီတစ်ခါတော့ သူ့ဒိုင်ယာရီထဲစာလေး ၂ ကြောင်းကြောင့် အတော်ဒေါကန်သွားကြတယ်ဆိုပဲ။ သူရေးမှတ်ထားပုံက…
“မနက် အာဂန္တု(သူငယ်ချင်းတွေ)လာ၊ လက်ဘက်ရည်လိုက်တိုက်၊ နှစ်ရာကုန်၊ နှမြော။”
နေ့လည် ဆေးကျောင်းသူလေး ၂ ယောက်လာ၊ တောင်ခြေ၊ ထမင်းလိုက်ကြွေး၊ ၅၀၀ ကုန်၊ မနှမြော…” တဲ့။

ကောင်းလိုက်တဲ့ ဘာသာပြန်

လွန်ခဲ့တဲ့ ၄ နှစ်လောက်က ဥပုသ်နေ့ တစ်နေ့မှာပေ့ါ။ တက္ကသိုလ်က စာသင်ဘက်သူငယ်ချင်း တွေနဲ့အတူ မန္တလေးတောင်ပေါ်တက်ပြီး တွေ့တဲ့နိုင်ငံခြားသားတွေကို အင်္ဂလိပ်စကားပြော လေ့ကျင့် ခဲ့ပါတယ်။ အဲဒီနေ့ကမှတ်မှတ်ရရပါပဲ။ တောင်းပြုံးပွဲသွားတဲ့ကားတွေက မန်းတောင်ရဲ့ အောက်နား ကနေ ဖြတ်ဖြတ်သွားနေပါတယ်။ ကားပေါ်ကလူငယ်၊ လူရွယ်တွေကနတ်ဆိုင်းတွေ၊ နတ်သီချင်းတွေ ဖွင့်သူဖွင့်၊ ဆိုသူဆိုနဲ့ အတော့်ကို မြူးကြွကြွရှိလှပါတယ်။
“အဲဒါ ဘယ်သွားကြတာလဲ” …
နိုင်ငံခြားသားကမေးပါတယ်။
“တောင်ပြုံးပွဲသွားတာ” လို့ ကိုယ်တော်တစ်ပါးကဖြေလိုက်ပါတယ်။
“တောင်ပြုံးပွဲဆိုတာဘာလဲ၊ ဘာလို့ တောင်ပြုံးပွဲလို့ ခေါ်တာလဲ” …မေးခွန်းတွေ ဆင့်ဆင့်လာပါတယ်။
ကိုယ်တော်လေးဘာသာပြန်ပြောလိုက်ပုံက “တောင်ပြုံး” ဆိုတာမောင်တိန်စမိုင်း(mountain smile)လို့ဆိုလိုတာပါ။ ခု အဲဒီမောင်တိန်စမိုင်းကို သွားနေကြတာ” တဲ့။
Oh! Wonderful! I have to go there to see mountain smile. အိုး.....အတော်ထူးဆန်းပါလား။ ငါလည်း တောင်ပြုံးတာကို သွားကြည့်မှ ဖြစ်မယ်…ဆိုပြီး တစ်ခါတည်း လစ်သွားပါလေရော…။

စပ်မိစပ်ရာ ဟာသများ(၂)

သက်သေပြလိုက်ပုံက

တစ်ခါက ပဋ္ဌာန်းပွဲတစ်ခုမှာပါ။ ပဋ္ဌာန်းအော်ရွတ်ရတဲ့အရှိန်နဲ့ ညရောက်တော့ ဗိုက်ဆာလာပါတယ်။ ဒကာမတစ်ယောက်က ဂျင်းသုပ်လာကပ်ရာ ခပ်၀၀ ကိုယ်တော်တစ်ပါးက ၀မ်းသာအားရနဲ့ “ဒို့ကတော့ ပွင့်ပွင့်လင်းလင်းပဲ၊ ဗိုက်ဆာနေတာနဲ့ အတော်ပဲ၊ ဟန်မဆောင်နိုင်ဘူး၊ ကဲ ကပ်စမ်းလို့ပြောရင်း ရှေ့ကုန်းပြီး လှမ်းယူလိုက်စဉ် သူ့ဖင်က “ဘူ”ကနဲ ခပ်ကျယ်ကျယ် အသံထွက်သွားပါတယ်။

ဘေးက ကိုယ်တော်တစ်ပါးက “ပွင့်လင်းမှု အားကြီးလွန်းလှပါတယ်…ဘုရား” ဆိုပြီး မျက်နှာရွံ့မဲ့မဲ့နဲ့ အရွမ်းဖောက်လိုက်ရာ ဝေါကနဲ ပွဲကျကုန်ပါတော့တယ်။

စာမတတ် လမ်းမှာဖတ်

တစ်ခါတုန်းက ရွာက ကိုရင်များကို မြို့ပေါ်စာသင်ဖို့ ခေါ်လာခဲ့ပါတယ်။ စာမတတ်ရင် လမ်းမှာဖတ်လို့ သူတို့နားလည်အောင်လည်း ရှင်းပြထားမိပါတယ်။ သူတို့ကို လမ်းတွေ မှတ်မိစေရန်၊ အပျင်းပြေစေရန် ဟိုဟိုဒီဒီ လျှောက်ပြလိုက်ပါတယ်။ တောက ရောက်လာခါစ ကိုရင်ငယ်တွေဆိုတော့ သူတို့အပြုအမူတွေက အတော့်ကို မျက်စိမွေးစူးစရာပါပဲ။ လမ်းမှာတွေ့တဲ့ ကား၊ ယာဉ်စတာတွေကို အော်ကြီးဟစ်ကျယ်နဲ့ လက်ညှိုးတွေ ထိုးထိုးပြီး ပြောလား၊ ဆိုလားနဲ့ပေါ့။

တစ်နေရာအရောက် လမ်းဘေးဆိုင်းပုဒ်ကို ကြည့်ပြီး“ယာဥများ မရပ်ရ” ဆိုတာ ဘာလဲ.. ကိုရင်ကြီးလို့ မိမိကို အော်မေးလိုက်ရာ လမ်းဘေးက လူများက ၀ါးကနဲ ဖြစ်သွားကြပါတယ်။ လှည့်ကြည့်လိုက်တော့ ယာဉ်များ မရပ်ရလို့ ရေးထားတာပါ။ “ဉ” အထက်က သင်္ဘောဆေးနဲ့ ရေးထားတဲ့ အသတ်က ပြုတ်နေတော့ သူတို့ ဖတ်တာက အမှန်ပါပဲ။

တစ်ခါ သူတို့အချင်းချင်း တစ်နေရာကို လက်ညှိုးထိုးပြီး “ဟာ ဟိုမှာ၊ ဂါရ၀” တဲ့။ သေချာကြည့်လိုက်တော့ သိန်း ၈၇၀ လို့ ဘောမှာ မြေဖြူနဲ့ ရေးထားတဲ့ ထီပေါက်ကြော်ငြာ ဖြစ်နေပါတော့တယ်။

နောက်တစ်နေရာရောက်မှ ပိုဆိုးပါလေရော။ “ဟေး၊ လိဥ ၅ လုံး တစ်ကျပ်တဲ့ကွ”။

လိပ်ဥတွင် “ပ်” ကို တမင်ပဲ လက်ဆော့ပြီး ဖျက်ထားတာလား၊ ဘာလားဆိုတာကို မတွေးတတ်တော့ပါဘူး။

ကလောင်စွမ်းထက်လိုက်ပါဘိ

လွန်ခဲ့တဲ့ နှစ်(၃၀)၀န်းကျင်လောက်ပေါ့။ ကိုယ်တော်တစ်ပါး ပခုက္ကူမြို့က နာမည်ကြီး စာသင်တိုက်ကြီးဆီကို စာသင်ဖို့ ကားနဲ့ သွားပါတယ်။ ကားမထွက်ခင်လေးမှာပဲ သူ့ရဟန်းဒကာမက ကပျာကယာပြေးလိုက်လာပြီး ဈေးထဲက ခြင်ထောင်တစ်လုံးကို ကမန်းကတမ်း လှူလိုက်ပါတယ်။ ဟိုရောက်တော့ အံကိုက်ပါပဲ။ အိုက်ကအိုက်၊ ခြင်ကကိုက်ဆိုတော့။

ကိုယ်တော်က ကျေးဇူးတင်လွန်းအားကြီးပြီး ချက်ချင်းသူ့ရဟန်းအမဆီကို စာပြန်လိုက်ပါတယ်။ “ဒကာမကြီးကို ဦးဇင်း တအားကျေးဇူးတင်မိတာပဲ၊ ညည ခြင်ထောင်လေးကို မြင်တိုင်း ဒကာမကြီးကို သတိရနေတာ……”။

စာက မဆုံးသေးပါဘူး။ ဒကာကြီးနဲ့ ဒကာမကြီးက နောင်ချိန် ချပါလေရောဗျာ….။

စကားပြောနည်း နိဿရည်း

ကိုယ်တော်လေးတစ်ပါး။ စာတော်တယ်။ အေးဆေးတယ်။ စကားပြောရမှာတော့ ၀န်လေးတယ်။ ပြောစလည်း သိပ်မရှိတော့ အေးအေးပဲ နေတာများနေတယ်။

တစ်နေ့ သူ့ဆရာတော်ကြီးက ကိုယ့်ဒကာ/မတွေကို စကားလေး၊ ဘာလေး ပြောပေးရတယ်လို့ ဆုံးမ။ ဘယ်က စပြောရမှန်း မသိဘူးဘုရားလို့ သူကလျှောက်။ ဆရာတော်ကြီးက မြင်ရာ စပြော၊ စမေးလိုက်ပေါ့တဲ့။

ကိုယ်တော်လေးလည်း ဆွမ်းခံသွားရာ အိမ်တစ်အိမ်ရောက်တော့ ဒကာမတစ်ယောက်ကို သူမြင်ရာ မေးလိုက်ပုံက “ဒကာမကြီး၊ ဗိုက်ကြီးနေတာ ဘယ်လောက် ကြာပြီလဲ” တဲ့။ တစ်ခါမှ စကားမပြောဘူးတဲ့ ကိုယ်တော်လေးရဲ့ ပွဲဦးထွက် နုတ်ခွန်းဆက်ကြောင့် ဒကာမခမျာ မျက်လုံးမျက်ဆန်ပြူးပြီး ပါးစပ်ဟကာ ဘာမှ မပြောနိုင်ဘဲ မင်သက်မိသွားပါတော့တယ်။

မိုးကိုယ်တော်

တစ်ခါက စာသင်တိုက်ကြီးတစ်တိုက်မှာ ခပ်ရိုးရိုးကုတ်ကုတ်နဲ့ စာကြိုးစားနေတဲ့ ကိုယ်တော်လေးတစ်ပါးပေါ့။ သူက စာပဲ ဖိကြိုးစားနေတော့ လူနဲ့သူနဲ့ စကားမပြောမိတာ များလာတယ်။ ကြာတော့ လူတောထဲ စကားမပြောဝံ့၊ မပြောတတ်သလို ဖြစ်လာပါတယ်။ ဘယ်ကစလို့ ဘယ်လို ပြောရမှန်းမသိ၊ သူ့ခမျာ အခက်တွေ့နေပါတော့တယ်။ ကျောင်းတိုက်ဆရာတော်ကြီးက တစ်ညမှာ သူ့ကိုယ်တွေ့များနဲ့ ယှဉ်ပြီး သြ၀ါဒပေးပါတယ်။ “စကားလုံးလုံး မပြောရင်လည်း မကောင်းကြောင်း၊ ဒကာ/မနဲ့ ဆက်ဆံတဲ့အခါ အလိုက်သင့် ပြောတတ်၊ ဆိုတတ်အောင် လုပ်ထားကြဖို့၊ ဘယ်က စပြောရမှန်းမသိရင် လွယ်ပါတယ်၊ တွေ့တွေ့ချင်း “ဒကာကြီး၊ နေကောင်းလား၊ ခင်များတို့ရွာ မိုးရွာလား” လို့ နုတ်ဆက်ပြောဆိုလိုက်ပေါ့တဲ့။”

စကားပြောရမှာ တွန့်နေတဲ့ ကိုယ်တော်လေးက သူ့ရွာလည်း ပြန်သွားရော တွေ့သမျှကို “ခင်များတို့ရွာ မိုးရွာလား”ချည်းမေးနေရာ ကြာတော့ ရွာသားများက နှာခေါင်းရွံ့ပြီး “မရွာဘူး…မိုးကိုယ်တော်၊ မိုးနတ်သားနဲ့ ခင်ရင်လည်း အကြောင်းကြားပေးတော်မူပါဦး…မိုးကိုယ်တော်”လို့စလိုက်ရာ မိုးကိုယ်တော်ခမျာ စိတ်ညစ်ညစ်နဲ့ မိုးကိုပဲ ခဏခဏ မျှော်ကြည့်နေပါတော့တယ်….။ ညရောက်တော့ ရွာထဲက စန္ဒယားလှထွတ်ရဲ့ “တိမ်တမန်” သီချင်းသံကြောင့် မိုးကိုယ်တော်လေးက ခေါင်းတဆတ်ဆတ် ညိမ့်နေပါတော့တယ်။

စပ်မိစပ်ရာ ဟာသများ(၁)

တွေ့ကြုံခဲ့တယ်…စာသင်သားဘ၀ ကသောင်းကနင်းများ။
ကြားခဲ့ရတယ်…ဗရုတ်သုက္ခဇာတ်လမ်းများ…။
မြင်ခဲ့၊ ဖတ်ခဲ့ရတယ်…ကမောက်ကမဖြစ်ရပ်များ…။
ရယ်ချင်မိခဲ့တယ်…အစီအငေါ မတည့်မှုများ….။
အဲဒါတွေ ပေါင်းလိုက်တော့ စပ်မိစပ်ရာ ဟာသများဖြစ်သွားတယ်။ ကဲ..စပ်..မစပ်.. အကဲဖြတ်တော်မူ ကြပါကုန်…..။

ကြယ်တွေ..လတွေ စုံသောညမှာ

လွန်ခဲ့တဲ့နှစ်(၂၀)ကျော်က ညမိုက်ညတစ်ညပေ့ါ။ လမိုက်ညဆိုရင် ဘာလို့ ကြယ်တွေ၊ လတွေ စုံရမှာလဲ…လို့ အသင် စောဒနာငြားအံ့။ သောဓနာပါ့မယ်..။

စာရေးသူတို့ ရွာဦးကျောင်းဘေးက စာသင်ကျောင်းမှာ ၄-တန်းကျောင်းသား၊ သူများကို ညည အပိုချိန်ခေါ်ပြီး စာသင်ပေးနေပါတယ်။ သင်တဲ့ဆရာက အရိုက်ကြမ်းတဲ့နေရာမှာ စိန်ဗေဒါနဲ့ နင်လား ငါလားပါပဲ။ ကြမ်းလွန်းလို့ နောက်ပိုင်းတော့ တစ်ရွာလုံးနဲ့ တစ်ယောက်ဖြစ်ပြီး ဥက္ကဋ္ဌတွေ၊ လူကြီးတွေနဲ့ အကြီးအကျယ် ပြဿနာတက်ပြီး လက်မှတ်ထိုးယူရတဲ့အဆင့်ထိ ရောက်သွားပါတယ်။

ဘုန်းကြီးကျောင်းသားလေးယောက်က တစ်ည ညီလာခံ ကျင်းပပါတယ်။ စည်းဝေးပွဲဆုံးဖြတ်ချက်က “ဒီည ၄-တန်းကျောင်းဆင်းရင် သူတို့သဘောကျနေတဲ့ ကောင်မလေးကို အမှောင်ထဲကနေချောင်းပြီး ဖက်နမ်းကြ စတမ်းတဲ့။” ဧရာမမန်ကြီးပင်ကြီးတစ်ပင်ကိုကွယ်ကာ ကျောင်းဆင်းကို စောင့်မျှော်နေပါတယ်။ လာပါပြီ။ အဖြူရောင်ဝတ်စုံလေးနဲ့။ ဖြေလှမ်းမှန်မှန်လှမ်းလို့။ ဖျတ်…ဖျတ်….ဖျတ်..နဲ့။ မန်ကြီးပင်နားအရောက် ဘုန်းကြီး ကျောင်းသားများက တစ်ပြိုင်နက် ၀ိုင်းဖက်နမ်းလိုက်ပါတယ်။ အဲဒီညက သူတို့လေးယောက် ကြယ်တွေ၊ လတွေ အစုံမြင်လိုက်ရတယ်ဆိုပဲ…။ ရှင်းချက်က သူတို့ဖက်နမ်းလိုက်တာဟာ ကောင်မလေးမဟုတ်ဘဲ အရိုက်အကြမ်းဆုံးဆရာ ဖြစ်နေလို့တဲ့……။

သတင်းထူး

စာသင်တိုက်ကြီးတစ်တိုက်က။ ကိုယ်တော်တစ်ပါး။ အကြွား သိပ်သန်။ လူစုံတာနဲ့ ဆီလိုအပေါက်ရှာပြီး ကြွားတတ်သူ။ တစ်နေ့ သူက ပြောတယ်။ “ကိုယ့်လူတို့ကို ကြုံတုန်းသတင်းထူးပြောရဦးမယ်..။ လမ်းမှာ ခွေးနှစ်ကောင်ကိုက်တာ၊ တပည့်တော်က ခေါက်ဆွဲစားရင်း ကြည့်နေမိတာ။ ကြေးအိုးဆီချက်ခေါက်ဆွဲတစ်ပွဲနဲ့ ရှယ်လဘက်ရည်တစ်ခွက်သောက်ရင်း…”

စကားစပြတ်သွား။ ဘေးကိုယ်တော်တစ်ပါးရဲ့ ကြားဖြတ်စစ်ဆင်ရေးကြောင့်။ “ထွီ…ကြွားစရာမရှိရင် ဖင်လှန်ပြပြီး ကြွားမယ့်ကောင်….”တဲ့။ ကြွားတဲ့ကိုယ်တော် မျက်နှာဇီးရွက်လောက်ပဲကျန်။ ဘေးကိုယ်တော်များ ၀ါးကနဲပွဲကျသွား တဟားဟားနဲ့ပါပဲ..။

ဗြူတီဖူးဆိုတာ ဟင်းကောင်းတာ

စာရေးသူနဲ့အတူနေတဲ့ သီရိလင်္ကာကိုယ်တော်တစ်ပါး။ အင်္ဂလိပ်က မရဘူး။ တစ်မနက်ပေါ့ စာရေးသူကို Broken English နဲ့ ဆင်ဟာလီစကားညှပ်မေးတယ်။ “ကျန်ဒါစီရိ! ဒန်ဆာလ… ဘရိတ်ဖတ်စ်..ဗြူတီဖူး? (စန္ဒာသီရိ..ဆွမ်းစားကျောင်းမှာ နံနက်စာ ဟင်းကောင်းလား?..)

စာရေးသူလည်း ဗြူတီဖူးကို လှတာလောက်ပဲ သိတော့ “No, Beautiful” လို့ ဖြေလိုက်တယ်။ သူလည်း ဆွမ်းငတ်ပါလေရော။ သူ့ကို ဗြူတီဖူးလို့ မပြောရကောင်းလားဆိုပြီး စာရေးသူနဲ့ စကားများပါလေရော။

သြော်..ဗြူတီဖူးဆိုတာ ဟင်းကောင်းတာကိုလည်း ပြောလို့ရပါလား…လို့ ကောက်ချက်ဆွဲနေမိတယ်။

စွဲမိပါသော...ခင်ရယ်....

အညာဒေသ အသက်(၉၀)ကျော် တောရွာတစ်ရွာက ဆရာတော်ကြီးတစ်ပါး။ တစ်နေ့ ပစ္စည်းတွေ ရှင်းခိုက် ပလပ်စတစ်နဲ့ အထပ်ထပ်ပတ်ပြီး သိမ်းထားတဲ့ ဆပ်ပြာအဟောင်း တစ်ခဲတွေ့။ ဖြည်ကြည့်လိုက်ရာ …ဆပ်ပြာခဲမှာ ကပ်ထားတဲ့ စာရွက်လေးပေါ်က စာလေးတစ်ကြောင်းကြောင့် “ဟိုက်...သေပါလေရော။ ငါသေချင်တယ်”ဟု ဆရာတော်ကြီးမိန့်။ စာက “ကိုရင့်ကို ချစ်တယ်တဲ့”

ရှင်းချက်တောင်းတော့…“ငါငယ်ငယ်က စွဲလမ်းခဲ့တဲ့ကောင်းမလေးက ပေး(လှူ)တာ၊ သူ့ကို စွဲလန်းလွန်းလို့ မသုံးရက်ဘဲ သိမ်းထားမိတာ ခုတော့ မဟာအမှားကြီးပါတကား”..တဲ့။

ထိုစဉ် တိုက်ဆိုင်စွာပဲ..ရွာထဲအသံချဲ့စက်က မြန်မာပြည်သိန်းတန်ဆိုထားတဲ့ ပြည်သန်းနွယ်ရဲ့သီချင်း “ချစ်ဒုက္ခ” ကို ဖွင့်လိုက်ရာ “စွဲလန်းလို့ သေမှာ ခင်ရယ်…” အပိုဒ်လည်းရောက်ရော ဆရာတော်ကြီးက ဆပ်ပြာခဲလေးကို နာနာဆုပ်ထားပါတော့တယ်…။

အနာဂတ်သာသနာ

အထက်အညာဒေသ ဧရာဝတီမြစ်ဘေးတွင် ရွာလေးတစ်ရွာရှိ၏။ နာမည်လေးက ရွာသာယာ။ တကယ့်လက်တွေ့တွင် မသာယာပေ။ ရွာသာယာသည် ရှေးအခါက နာမည်နှင့်လိုက်ဖက်စွာ အလှူပေးသံများ၊ အမျှဝေသံများ၊ ကြေးစည်သံများဖြင့် တကယ်သာယာခဲ့သည်။ အေးချမ်းခဲ့သည်။ သာယာစည်ကားခဲ့သည်။

ယခုတော့ နိုင်ငံတစ်ခုလုံး သူ့ကျွန်ဘ၀ကျရောက်နေချိန်မို့ အားလုံး ကျီးလန့်စာစား ဖြစ်နေကြ၏။ စစ်ဖိနပ်သံ၊ မြင်းခွာသံ၊ ဘင်ခရာသံ၊ မကျေနပ်သံ စသည်များက ငြိမ်းချမ်းရေးသံစဉ်များကို အနိုင်ယူထားကြသည်။

ရွာဦးကျောင်းတွင်လည်း ကျောင်းသားမရှိ၊ ကိုရင်မရှိဖြစ်နေသည်။ ဆရာတော် ဦးဝိသုဒ္ဓအဖို့လည်း အနာဂတ် သာသနာရေးအတွက် တွေးမိတိုင်း ရတက်မအေး ဖြစ်နေမိသည်။ ဆရာတော်သည် လောကဓံကို တရားသဘောဖြင့် ဆင်ခြင်ကာ အခက်အခဲ အမျိုးမျိုးကြားမှပင် အနာဂတ်သာာသနာတော်အတွက် မျိုးဆက်သစ် ရဟန်းတော်တစ်ပါး မွေးထုတ်ပေးနိုင်ခဲ့သည်။

ဆရာတော်မွေးထုတ်ပေးခဲ့သော မျိုးဆက်သစ် ရဟန်းတော်၏ ဘွဲ့တော်မှာ ဦးဥတ္တရ ဖြစ်သည်။ ဦးပဉ္စင်း ဦးဥတ္တရသည် ဉာဏ်ကောင်းသည်။ ၀ိနည်းလည်း လေးစားသည်။ ဦးဥတ္တရသည် ပခုက္ကူမြို့၊ မဟာ ၀ိသုတာရာမကျောင်းတိုက်ကြီးမှ နာမည်ကြီးလှသော ဆရာတော်ဦးဂန္ထသာရစသော ဆရာတော်ကြီးများ ထံတွင် ရိုသေကျိုးနွံစွာဖြင့် ပိဋကတ်စာပေများကိုလည်း စနစ်တကျလေ့လာခဲ့သည်။ ဆရာတော်ကြီးများက ပိဋကတ်ပင်လယ်ပြင်ကို ကူးခတ်နိုင်သော ညဏ်ပညာ လှော်တက်ကိုလည်း ပေးခဲ့၏။ သံသရာတစ်ဖက်ကမ်းကို ငြိမ်းချမ်းစွာ ဖြတ်သန်း နိုင်စေရန် ၀ိနည်းကျင့်ထုံးများကိုလည်း အခြေခံကျကျ သင်ပြပေးခဲ့သည်။

ဦးပဉ္စင်းဦးဥတ္တရသည် စာပေကျမ်းဂန်လည်း တတ်မြောက်ခဲ့ပြီ။ ဆယ်ဝါလည်း ပြည့်ပြီ။ ငယ်ဆရာတော်လည်း မရှိတော့ပြီမို့ ကျောင်းထိုင်ဆရာတော်ကြီးတစ်ပါး ဖြစ်လာလေ၏။ ရပ်ရွာပေါ်မှာလည်း သြဇာညောင်းသည်။ ဆရာတော် ဦးဥတ္တရသည် အနာဂတ်သာသနာတော်အကျိုးမျှော်ကိုးကာ သာသနာပြုလုပ်ငန်းများကို ပြင်ဆင် နေသည်။

ထိုအခိုက်မှာပင် တိုင်းပြည်က မငြိမ်မသက်ဖြစ်လာလေသည်။ ရောင်စုံသူပုန်များ၏ ဘေးရန်ကြောင့် ရွာသာယာလည်း တစ်ဖန်မသာမယာ ဖြစ်လာပြန်သည်။ ဆရာတော်လည်း သာသနာပြုလုပ်ငန်းများကို အေးချမ်းစွာဖြင့် မဆောင်ရွက်နိုင် တော့ပေ။ ရွာသာယာအဖို့တော့ ပျဉ်းမငုတ်တိုကဲ့သို့ စစ်ကိုလည်းခံ၊ ခြအုံလည်းဖြစ်၊ ဓားထစ်လည်းခံဘ၀ဖြစ်နေရသည်။

ဆရာတော်ဦးဥတ္တရ လွန်တော်မူသောခါ ဆရာတော်ဦးဇောတိဿရ ကျောင်းထိုင်ဆရာတော်ဖြစ်လာသည်။ ဦးဇောတိဿရသည် ခေတ်အခြေအနေစသော အကြောင်းအမျိုးမျိုးကြောင့် ပရိယတ္တိစာပေကို ကောင်းစွာသင်ကြားခွင့် မရခဲ့ပေ။ ထို့ကြောင့် ဆရာတော်သည် မျက်နှာငယ်ရသည်။

သို့သော် ဆရာတော်သည် အမြှော်အမြင်ကြီးမားသည်။ စိတ်သဘောထားပြည့်ဝသည်။ အနာဂတ် သာသနာအတွက် အားကိုးလောက်သော တပည့်များစွာ မွေးထုတ်ပေးနိုင်သည်။ ဆရာတော်၏တပည့်များမှာ ဦးပညော၊ ဦးဉာဏော၊ ဦးစန္ဒ၊ ဦးသဂ္ဂ၊ ဦးစက္က၊ ဦးရေ၀တ၊ ဦးဥတ္တရတို့ ဖြစ်ကြသည်။ ဆရာတော်သည် မိမိ၏တပည့်များကို မိမိကဲသို့ မျက်နှာမငယ်စေရန်၊ အနာဂတ်သာသနာတော်ကို အရည်အချင်းရှိရှိ ထမ်းဆောင်နိုင်စေရန် နာမည်ကြီးစာသင်တိုက်ကြီးများဆီသို့ ပို့လွှတ်၍ ပညာသင်စေသည်။

ဆရာတော်ကို မလိုသူအချို့က “မျောက်ပြ ဆန်တောင်း” စသဖြင့် အမျိုးမျိုး ဝေဖန်ပြောဆိုကြ၏။ ဆရာတော်က အပြုံးမပျက် သည်းခံခဲ့ပါသည်။ တပည့်များကလည်း ဆရာ့ကျေးဇူးကို နားလည်ကြသည်။ စည်းကမ်းလိုက်နာပြီး စာကြိုးစားကြသည်။ ထို့ကြောင့် ပထမငယ်၊ ပထမလတ်၊ ပထမကြီး၊ အစိုးရ ဓမ္မာစရိယ စသဖြင့် စာမေးပွဲအသီးသီးမှာ အောင်ပန်းအလီလီ ဆင်မြန်းနိုင်ခဲ့ကြသည်။

ဤသို့ဖြင့် ရွာသာယာသည် စိုပြေလာပြန်သည်။ နာမည်နှင့်လိုက်ဖက်စွာ သာယာလာလေပြီ။ ပတ်ဝန်းကျင် ရွာများကပါ လေးစားလာကြသည်။ မိုးလေ၀သ ကောင်းမွန်လာပြီး ဆန်ရေစပါးများလည်း ပေါများလာသည်။ မိမိတို့ရွာမှ ဦးဇင်းများ စာမေးပွဲအောင်မြင်ပြီဆိုလျှင် တစ်ရွာလုံး ၀မ်းသာလိုက်သည့်ဖြစ်ခြင်း၊ တစ်နှစ်လုံး မိုးထဲ၊ လယ်ထဲတွင် နွားနှင့်ရုံးခဲ့ရသည့် ပင်ပန်းမှုများ တစ်ခါတည်း ပျောက်သွားကြသည်။ မိမိတို့ဦးဇင်းများ၏ အောင်မြင်မှုများကို အိုးစည်၊ ဗုံမောင်းများဖြင့် သောင်းသောင်းဖြဖြ ကြိုဆိုကြသည်။ တန်ခူးလ စာမေးပွဲများ ဖြေပြီးလျှင် ဦးဇင်းများကလည်း ဆွေမျိုးမိဘများနှင့် ၀မ်းသာအားရ တွေ့ဆုံရန် ပြန်လာလေ့ရှိကြသည်။ ရွာသူ၊ ရွာသားများကလည်း လယ်ယာကောက်စပါးများ ရိတ်သိမ်းပြီးချိန်မို့ ကျောင်းကန်ဘုရားများသွား၍ ဥပုသ်စောင့်ကြသည်။ တရားနာကြသည်။ အလှူအတန်းများ ပေးကြသည်။ မိမိတို့ သားမြေးများကိုလည်း သာသနာ့ဘောင်သွတ်သွင်း၍ ရှင်သာမဏေပြုစေကာ မွန်မြတ်သော ကုသိုလ်ကောင်းမှုများဖြင့် ဗုဒ္ဓသာသနာတော်ကို ချီးမြှောက်ထောက်ပံ့ကြသည်။

ဦးဇင်းများကလည်း မြို့ကြီး၊ ပြကြီးများမှ ပြန်လာပြီး ခေတ်အမြင်ရှိသူများပီပီ ကိုယ့်ရပ်၊ ကိုယ့်ရွာကို တိုးတက်စေ ချင်ကြသည်။ ထို့ကြောင့် ယဉ်ကျေးမှုသင်တန်းများ ဖွင့်ပေးခြင်း၊ စာကြည့်တိုက်၊ စာကြည့်အသင်းများ ထူထောင်ပေးခြင်း၊ တရားပွဲ များ စီစဉ်ကျင်းပပေးခြင်းတို့ဖြင့် ရွာအကျိုး၊ အများအကျိုးကို တတ်စွမ်းသမျှ ဆောင် ရွက်ကြသည်။ အချင်းချင်းလည်း ညီညွတ်ကြသည်။ “စည်းလုံးခြင်းသည် အင်အား၊ ညီညွတ် ခြင်းသည် စွမ်းအား” ဟုလည်း နားလည်သဘောပေါက်ထားကြသည်။ ပြဿနာများ၊ အခက်အခဲများ တွေ့ကြုံလာ လျှင်လည်း ၀ိုင်းဝန်းဆွေးနွေး ဖြေရှင်းကြသည်။

ရွာသာယာသည် ယခုမှ နာမည်နှင့်လိုက်ဖက်စွာ တကယ်သာယာလာလေပြီ။ ရွာသာယာ၏ သတင်းမွှေးပုံ များကတော့ ပြောမယုံ၊ ကြုံဖူးမှ သိပေလိမ့်မည်။ ဦးဉာဏောက စာမေးပွဲအောင်ရုံမျှဖြင့် အားမရ၊ ဓမ္မကထိက သင်တန်းများကိုပါ စိတ်ပါလက်ပါ တက်ရောက်လေ့လာစည်းပူးလေသည်။ ဦးစန္ဒကလည်း ခေတ်လူငယ်၊ လူရွယ်များကိုပါ စည်းရုံးနိုင်စေရန်၊ ဗုဒ္ဓတရားတော်များကို ကမ္ဘာသို့ ဖြန့်ချီနိုင်ရန်၊ ခေတ်မီမီသာသနာပြုနိုင်ရန် ပါဠိစာပေမျှဖြင့် အားမရဘဲ အင်္ဂလိပ်စာပေများကိုပါ ထပ်မံလေ့လာဆည်းပူးပြန်သည်။ ဦးသဂ္ဂကလည်း ဆေးပညာ၊ ဗေဒင်ပညာများကိုပါ ဗဟုသုတအဖြစ် လေ့လာလိုက်စားလေ၏။ ဦးစိတ္တရကမူ ရေဒီိယို၊ ကက်စက်များပြုပြင်ခြင်း၊ လျှပ်စစ်ပစ္စည်းများ တပ်ဆင်ခြင်းစသော အီလက်ထရောနစ်ပညာများပါ တတ်ကျွမ်း လေသည်။ တပည့်များသည် မိမိတို့ကိုယ်စီ တတ်ကျွမ်းထားသော အတတ်ပညာ၊ အသိပညာများဖြင့် ရပ်အကျိုး၊ ရွာအကျိုးများကို တက်ညီ၊ လက်ညီ ဆောင်ရွက်ကြသည်။

ရွာသာယာဘေးမှ ဧရာဝတီမြစ်ရေသည် ၀န်းကျင်မှ လေနုအေးလေးများကြောင့် ကြည်လင်အေးမြ သာယာလျှက်ရှိသည်။ ဆရာတော်ကလည်း တပည့်များ၏ အောင်မြင်မှုများ၊ တတ်ကျွမ်းမှုများကို တပြုံးပြုံးနှင့် ဂုဏ်ယူမဆုံး၊ ၀မ်းသာ၍မဆုံး ဖြစ်နေသည်။ တပည့်များ၏ အောင်မြင်မှုများကိုကြားရလေတိုင်း ဆရာသခင်၏ မျက်နှာမှာ လရောင်ဝါနှင့်တွေ့သော ကြာပဒုမ္မာကဲ့သို့ ပီတိများ ဖြာနေတတ်သည်။

တပည့်များထဲတွင် ဦးပညောက ၀ါအကြီးဆုံးဖြစ်သည်။ သို့သော် ဉာဏ်သိပ် မကောင်းပေ။ ငယ်၊ လတ်၊ ကြီး စာမေးပွဲများကိုပင် အောင်မြင်ရန်ပင် မနည်း ကြိုးစားခဲ့ရသည်။ ဦးပညောကို ဆရာတော်က သနားသည်။ ကရုဏာပိုသည်။ ဆရာတော်ကလည်း သက်တော်၊ ၀ါတော်လည်းကြီးရင့်လာပြီဖြစ်သည်။ ထို့ကြောင့် အနီးကပ် ပြုစုရန် ဦးပညောကိုပင် မိမိအနား ခေါ်ထားလိုက်သည်။

မုန်တိုင်းထန်လျှင် လှိုင်းထမြဲဖြစ်သည်။ ရွာသာယာတွင် မမျှော်လင့်ဘဲ မုန်တိုင်း ထန်လာလေပြီ။ ရွာသာယာ၏ ဥယျာဉ်မှူးကြီး ဆရာတော် ဦးဇောတိဿရသည် တပည့်များ၏ စွမ်းရည်ကို ယုံကြည်သည့်အလား မမျှော်လင့်ဘဲ မျက်နှာလွှဲသွားလေသည်။ ဆရာတော်သည် ရုတ်တရက်လေဖြတ်ကာ ပျံလွန်တော်မူသွားရှာသည်။

ဦးပညောသည် အားလုံးထဲတွင် ၀ါလည်းအကြီးဆုံး၊ ဆရာတော်ကိုလည်း အနီးကပ် ပြုစုနေရသူမို့ ဦးပညောကို ကျောင်းထိုင်အဖြစ်ခန့်အပ်ချင်ကြသည်။ သို့သော် ဦးဉာဏောနှင့် သူ၏ဆွေမျိုးမျာက သဘောမတူကြ။ ဦးဉာဏောက ဦးပညောနှင့် ၀ါအတူတူပင်ဖြစ်သည်။ ရဟန်းဖြစ်သည့်ရက်သာ အနည်းငယ် နောက်ကြခြင်း ဖြစ်သည်။ စာလည်းတတ်၊ အပြောအဟောလည်း ကောင်းသည်။ သို့ဖြစ်၍ ဦးဉာဏောသာ ကျောင်းထိုင်းဆရာတော် ဖြစ်သင့်သည်ဟူသော သတင်း များ ထွက်လာသည်။

အချို့ကလည်း ဦးစန္ဒကို ပို၍ သဘောကျလေသည်။ ဦးစန္ဒက ခေတ်အမြင်လည်း ရှိသည်။ စည်းရုံးရေး လည်းကောင်းသည်။ ထို့ကြောင့် သုံးပါးဆိုင် (တိသန္တက)အဖြစ် လွှဲအပ်သင့်သည်ဟူသော အဆိုပြုချက်များ ကလည်း ထွက်ပေါ်လာပြန်သည်။

တစ်ဖန် ဦးသဂ္ဂနှင့် ဦးစိတ္တရ၏ အသိုင်းအ၀ိုင်းများကလည်း “ဒို့ဦးဇင်းတွေကိုတော့ ဘေးချိတ်ထားတယ်၊ အပ်မှာဆိုလည်း အကုန်လုံးကိုအပ်” ဟူ၍ အဆို တင်သွင်း လာကြပြန်သည်။ “ဆရာမြှောက်တော့ ဒကာမွဲ၊ ဒကာမြောက် တော့ ဆရာလဲ” ကိန်းဆိုက်လာသည်။ ဦးဇင်းများ၏ ပင်ကိုယ်စိတ်များက ဖြူစင်ကြသည်။ သို့သော် ပတ်ဝန်းကျင်၏ ပယောဂများ၊ ဘေးတီးမှုများကြောင့် တစ်ဦးပေါ်တစ်ဦး မခံချင်စိတ်များ၊ အထင်လွဲမှုများ ပေါက်ဖွားလာကြသည်။ ဦးစန္ဒက ညီညွတ်မှုကို လိုလားသည်။ ဦးဉာဏောက ညှိမရပေ။ ပို၍ဆိုးသည်မှာ “ဘုန်းကြီးအမှု ရွာပတ်ခြင်း” ဖြစ်သည်။ ကိုယ့်ဦးဇင်း၊ သူ့ဦးဇင်း ခွဲရေး၊ တွဲရေးများကြောင့် အချင်းချင်း ပြိုင်ဆိုင်မှုများ၊ ခိုက်ရန်ဖြစ်ပွားမှုများ ဖြစ်လာသည်အထိ ပြဿနာက ကြီးထွားလာလေသည်။

ညက တိတ်ဆိတ်၏။ လက သာယာ၏။ တိတ်ဆိတ်အေးမြသော လရောင်အောက်တွင် မအေးမျှနိုင်သူ တစ်ဦးရှိသည်။ သူကား ဦးစန္ဒပင်။

ဦးစန္ဒသည် နာမည်နှင့် လိုက်ဖက်စွာ သာယာစပြုလာသော မိမိရွာ၏ ဘာသာရေး၊ လူမှုရေးပြိုကွဲမှုများကို တွေးကာ စိတ်ထိခိုက်နေမိသည်။ မိမိရွာ၏ အနာဂတ်သာသနာရေးကို ဘယ်သို့ဘယ်ပုံပြုပြင်ရလျှင် ကောင်းမည်နည်းဟု တွေးတောရင်း ဦးစန္ဒ၏စိတ်များ ပူလောင်ဆူပွက်နေသည်။

အေးမြသော လရောင်အောက်တွင် ရွာသာယာလေးက တိတ်ဆိတ် ခြောက်သွေ့နေသည်။ ရွာတောင်ဘက် တောတန်းများဆီမှ ခွေးအူသံများကလည်း ငြိမ်းချမ်းမှုကို ဖျက်ဆီးလျှက်ရှိနေ၏။

အော် ရွာနာမည်လေးက ရွာသာယာ၊ တကယ့်လက်တွေ့တွင် မသာယာသေးပါလား-------------။

စရဏ
(၂၀၁၀၊လင်္ကာတမန်မဂ္ဂဇင်းတွင် ရေးသားခဲ့သော ၀တ္ထု)

အောင်မြင်တဲ့ဘ၀

နှလုံးသားတွေ ထက်သန်နေပြီဆိုရင်
မင်းဘ၀ ရှင်သန်နေပြီပေ့ါ….။
မျှော်လင့်ချက်အိပ်မက်တွေ
မင်းမျက်လုံးထဲ တောက်ပနေပြီဆိုရင်
အဲဒါ မင်းရဲ့ ရှင်သန်ခြင်းပဲ…….။
လွတ်လပ်စွာ တိုက်ခတ်တဲ့လေလို……..
စီးဆင်းနေတဲ့ရေလို……..
အမြဲရှင်သန်နေဖို့ မင်းဘ၀ကို ကြိုးစားလိုက်ပါ……။
အချိန်တိုင်း၊ အခွင့်အရေးတိုင်းကို
မင်းလက်တွေ ဖွင့်ပြီး ထွေးပိုက်လိုက်ပါ……။
မျက်လုံးတွေကို မိုးကုတ်စက်ဝိုင်းထိ ပို့ထားလိုက်…..။
ပြီးရင် မျှော်လင့်ချက်ခြေလှမ်းတွေနဲ့ မှန်မှန်လျှောက်….။
မင်းပိုင်တဲ့အချိန်တွေ..၊ မင်းရဲ့ စွမ်းအားတွေကို
တဒင်္ဂပျော်ရွှင်မှုတွေထဲ မနစ်မြုပ်စေပါနဲ့..။
အဲဒီအချိန်..............
သံစဉ်ညှိမထားတဲ့ ချိုမြိန်တဲ့ လက်ခုပ်သံတွေ
မင်းရဲ့ထံပါး ဘ၀ဂ်လျှံသွားလိမ့်မယ်……။
သီရိလင်္ကာနိုင်ငံ၊ Daily News,Fri,Aug,19,2011 မှ "Live life to the fullest"ဆောင်းပါးထဲက "ZNMD" အမည်ရှိကဗျာကို ဆီလျှော်အောင် ဘာသာပြန်ဆိုဖွဲ့လိုက်သည်။

ကမ္ဘာမြေအတွက် ပန်းနှစ်ပွင့်

ကမ္ဘာမြေ သာယာစေဖို့ ပန်းပွင့်လေးများက သူ့အဆင်းနှင့်သူ၊ သူ့တန်ဖိုးနှင့်သူ အလှတန်ဆာ ဆင်ပေးကြလေ၏။ ကမ္ဘာမြေကလည်း ပန်းပွင့်လေးများ၏ တန်ဖိုး၊ အလှ၊ အရေးပါမှုများကို အသိအမှတ် ပြုပါ၏။ အသိအမှတ်ပြု သောကြောင့်လည်း ပန်းပွင့်လေးများကို ဘုရားအား ပူဇော်ရာ၊ ဦးခေါင်းကို တန်ဆာဆင်ရာ၊ အခမ်းအနားများ ပြင်ဆင်ရာ၌ မြတ်မြတ်နိုးနိုးဖြင့် အသုံးပြုကြခြင်း ဖြစ်ပါ၏။

ချစ်သူ၊ ကြင်သူများကလည်း မိမိတို့၏ ချစ်သူများကို ပန်းပွင့်လေးများပေးသူပေး၊ ပန်းနှင့်တင်စားကာ ကဗျာဖွဲ့ သူဖွဲ့ဖြင့် ပြုလေ့ရှိ၏။ စာရေးဆရာ၊ ကဗျာဆရာများကလည်း လူ့ဘ၀၏ အလှ၊ ရသ၊ ဒဿနများကို ပန်းပွင့်လေးများနှင့်တင်စားရေးဖွဲ့လေ့ရှိသည်။ ပန်းချီဆရာများ၏ စုတ်ချက်များကလည်း ပန်းပွင့်လေးများကို အသိအမှတ် ပြုပေးကြလေ၏။

မြတ်ဗုဒ္ဒကလည်း ဘ၀ကို ပန်းနှင့်နှိုင်းယှဉ်ပြီး တရားဒေသနာများ ဟောကြားတော်မူခဲ့၏။ အမှန်တကယ်လည်း ဘ၀နှင့်ပန်းသည် ခွဲ၍ မရလောက်အောင် ဖြစ်စဉ်များတူညီနေလေ၏။ မြတ်ဗုဒ္ဓသည်ပင် ဘုရားအဖြစ်သို့ ရောက်ရှိအောင် ပန်းပွင့်လေးများဖြင့် အလောင်းတော်ဘ၀ကို အစပြုခဲ့ခြင်းဖြစ်၏။

ဘုရားအဖြစ်ရောက်ရှိအောင် ပန်းပွင့်လေးများဖြင့် အစပြုခဲ့ကြောင်းကို သုမေဓာ ရှင်ရသေ့ ဘ၀က သက်သေခံလျှက်ရှိ၏။ ဒီပင်္ကရာမြတ်စွာဘုရားနှင့် သံဃာတော်များကြွလာမည့်လမ်း မပြီးဆုံးသေ၍ မိမိကိုယ်ကို တံတားခင်းကာ အသက်ကိုပင် စွန့်လွှတ်ပေးဆပ်ဝံ့သော သုမေဓာရှင်ရသေ့ကို အနီးတွင်ရှိနေသော သုမိတ္တာ အမျိုးကောင်းသမီးလေးက သဘောကျလျှက်ရှိ၏။ သဘောကျ၍လည်း မိမိလက်ထဲတွင်ရှိသော ကြာပန်းရှစ်ခုကို သုမေဓာရှင်ရသေ့အား ငါးပွင့်၊ ဒီပင်္ကရာ ဘုရားရှင်အား သုံးပွင့် လှူလိုက်ခြင်းဖြစ်၏။

ငါးပွင့်နှင့် သုံးပွင့်။ သင်္ချာသဘောအရ မညီမျှပေ။ သုမေဓာရှင်ရသေ့နှင့် ဘုရားရှင်အား လေးပွင့်စီလှူလိုက်လျှင် အညီအမျှဖြစ်သွားမည် ဖြစ်၏။ ယခုတော့ သုမေဓာရှင်ရသေ့အား နှစ်ပွင့်ပို၍ လှူခြင်းကြောင့် သင်္ချာသဘော အရ မညီမျှခြင်း ဖြစ်သည်။ သို့ရာတွင် နှလုံးသားရှုထောင့်မှကြည့်လျှင် ညီမျှ၏။ အဘယ့်ကြောင့်နည်း၊ သုမေဓာ ရှင်ရသေ့သည် မိမိနှင့်ရွယ်တူလည်းဖြစ်၏။ ရုပ်ရည်အဆင်းချောမော တင့်တယ်ရုံမျှမက ပစ္စည်းဥစ္စာများစွာ ကြွယ်ဝသော သူဋ္ဌေးသားလည်း ဖြစ်၏။ ထို့ကြောင့် သုမိတ္တာ၏ နှလုံးသားထဲတွင် သုမေဓာ ရှင်ရသေ့လေးအပေါ် မေတ္တာပန်းများ ပွင့်လန်းလျှက်ရှိ၏။ မေတ္တာပန်းများ ပွင့်လန်းနေသောကြောင့်လည်း ပန်းတစ်ပွင့်တိုး၍ လှူခြင်း ဖြစ်၏။ နောက်တစ်ပွင့်မှာ ကရုဏာပန်းဖြစ်၏။ ငယ်ရွယ်နုပျိုသောသူဋ္ဌေးသားလေး သုမေဓာရှင်ရသေ့၏ ခက်ခဲ ပင်ပန်းစွာလုပ်ကိုင်နေမှုကိုကြည့်၍ သုမိတ္တာ၏ နှလုံးသားထဲတွင် သနားကြင်နာမှု ကရုဏာပန်းများ ပွင့်လန်းလျက်ရှိ၏။ ထို့ကြောင့်ပင် ကရုဏာပန်းတစ်ပွင့် တိုးရခြင်းဖြစ်သည်။ မေတ္တာနှင့် ကရုဏာကြာပန်းနှစ်ပွင့်သည် နှလုံးသားကို ကိုယ်စားပြုထားပါ၏။ ထို့ကြောင့် ငါးပွင့်နှင့် သုံးပွင့်သည် သင်္ချာသဘောအရ မညီမျှသော်လည်း နှလုံးသားသဘောအရ ညီမျှရခြင်းဖြစ်သည်။

အလောင်းတော်သုမေဓာရှင်ရသေ့သည် ထိုပန်းနှစ်ပွင့်ကို လက်ခံခဲ့၏။ ထိုပန်းနှစ်ပွင့်၏ အင်အားဖြင့် ပါရမီများ စွာဖြည့်ကျင့်ခဲ့၏။ ကိုယ်ကျိုးစွန့်၍ အများအကျိုးကို ဆောင်ရွက်ဖြင်းဖြင့် ဘ၀များစွာ စွန့်လွတ်အနစ်နာခံခဲ့၏။ ပေးဆပ်ခဲ့၏။ ဘ၀များစွာဟူသည် သာမန်ကာလျှံကာ များစွာမဟုတ်၊ မရေမတွက်နိုင်လောက်အောင် ရေတွက် ခြင်းငှါ မစွမ်းနိုင်လောက်အောင် များပြားသော ဘ၀များစွာဖြစ်၏။ ရေတွက်ခြင်းငှါ မစွမ်းနိုင်သောကြောင့်လည်း အပေါင်းသင်္ချာသဘောအရ လေးသင်္ချေနှင့် ကမ္ဘာတစ်သိန်းဟု စုပေါင်းခေါ်ဝေါ်သုံးနှုန်းထားခြင်းဖြစ်သည်။

ပါရမီများပြည့်စုံ၍ ဘုရားဖြစ်ပြီးနောက်တွင်လည်း လေးဆယ့်ငါးဝါတိုင်တိုင် မနားမနေ တရားရေများ တိုက်ကျွေးတော်မူခဲ့၏။ ဝေနေယျသတ္တ၀ါများအပေါ် မေတ္တာ၊ ကရုဏာ ကြီးမားစွာထားတော်မူခဲ့၏။ ကမ္ဘာမြေအတွက် မေတ္တာ၊ ကရုဏာပန်းများ ပွင့်လန်းစေခဲ့၏။ သုမိတ္တာ၏ မေတ္တာ၊ ကရုဏာပန်းနှစ်ပွင့်သည် ကမ္ဘာမြေ အေးမျှစေဖို့ များစွာအထောက်အကူ ဖြစ်ခဲ့ပါ၏။

မြတ်ဗုဒ္ဓကလည်း ကမ္ဘာမြေအတွက် မေတ္တာ၊ ကရုဏာပန်းများ လိုအပ်လျှက်ရှိကြောင်းကို မေတ္တာ၊ ကရုဏာ၊ မုဒိတာ၊ ဥပေက္ခာဟူသော ဗြဟ္မ၀ိဟာရ တရားတော်များဖြင့် စနစ်တကျ ရှင်းလင်းဟော်ပြတော်မူခဲ့၏။ မဟာ ယာန ဗုဒ္ဓဘာသာ၌လည်း မေတ္တာသည် မိခင်၊ကရုဏာသည် ဖခင်ကို ကိုယ်စားပြုကြောင်းကို ကြာပန်းစသော သင်္ကေတများဖြင့် ဖော်ပြလေ့ရှိကြ၏။ အခြားဘာသာများကလည်း မေတ္တာတရားများ ထားရှိဖို့ရန် လမ်းညွန် ခဲ့ကြ၏။ အမှန်တကယ်လည်း မေတ္တာ၊ ကရုဏာတရားများထားရှိရန် လိုအပ်ပါ၏။ မေတ္တာ၊ ကရုဏာတရား များသာ အမြဲထွန်းကားနေပါက ဤကမ္ဘာပေါ်တွင် ကြောက်မက်ဖွယ်စစ်ပွဲကြီးများ၊ အနိုင်ကျင့်ဗိုလ်ကျမှုများ၊ ခေါင်းပုံဖြတ်မှုများ၊ ကြမ်းတမ်းရက်စက်ယုတ်မာမှုများ၊ မတရားမှုများ ပေါ်ပေါက်လိမ့်မည် မဟုတ်ပေ။

မုဒိတာနှင့် ဥပေက္ခာသည် ကျင့်နိုင်ဖို့ ခက်ခဲ၏။ မေတ္တာနှင့် ကရုဏာသည် ဖြည့်ကျင့်ဖို့လည်း လွယ်ကူ၏။ လူသားတို့၏ သန္တာန်၌လည်း လွယ်လွယ်ကူကူ ဖြစ်လေ့ရှိ၏။ ထို့ကြောင့်လည်း မြတ်ဗုဒ္ဓက မေတ္တာ၊ ကရုဏာ၊ မုဒိတာ၊ ဥပေက္ခာဟူ၍ အစဉ်အတိုင်း ဟောကြားတော်မူခဲ့ခြင်းဖြစ်၏။ တစ်ဆင့်ပြီး တစ်ဆင့် ဟောကြားတော် မူခဲ့ခြင်းဖြစ်သည်။ မေတ္တာနှင့် ကရုဏာသာ ပြည့်စုံလာပါက မုဒိတာ၊ ဥပေက္ခာတရားများကိုလည်း ဖြည့်ကျင့် လာနိုင်မည်ဖြစ်၏။ ထို့ကြောင့်လည်း အဆင့်ဆင့် ဟောကြားတော်မူခြင်းဖြစ်သည်။

မိမိတို့အနေဖြင့် တစ်ဦးအပေါ် တစ်ဦး မေတ္တာ၊ ကရုဏာစိတ်များထားရှိရန် များစွာလိုအပ်လှပါ၏။ အားလုံးကို ညီကိုမောင်နှမစိတ်၊ အားလုံးကို သနားကြင်နာစိတ်၊ ကူညီရိုင်းပင်းစိတ်များ ထားနိုင်ခြင်းသည် မေတ္တာ၊ ကရုဏာစိတ်များထားခြင်းပင် ဖြစ်သည်။ ယခုအခါ မေတ္တာ၊ ကရုဏာပန်းများ ပျောက်ဆုံးလာခြင်းကြောင့် ကမ္ဘာမြေကလည်း ပူလောင်ခြောက်သွေ့လာလျက်ရှိပါ၏။ အကျည်းတန်စလည်း ပြုလာလေ၏။

ကမ္ဘာမြေ သာယာစေဖို့ ပန်းပွင့်လေးများက သူ့အဆင်းနှင့်သူ၊သူ့တန်ဖိုးနှင့်သူ အလှတန် ဆာဆင်ပေးကြလေ ၏။ ကမ္ဘာမြေကလည်း ပန်းပွင့်လေးများ၏ တန်ဖိုး၊ အလှ၊ အရေးပါမှုများကို အသိအမှတ်ပြုပါ၏။

ထို့ကြောင့် မိမိတို့အနေဖြင့် လောကအလှများ၊ အဖိုးတန်မှုများ ပျောက်ဆုံးမသွားရန် အရေးပါဆုံး၊ အထိရောက် ဆုံးဖြစ်သော မေတ္တာနှင့်ကရုဏာပန်းများ ထာဝစဉ်ပွင့်လန်းနေဖို့ ကြိုးစားသင့်ပါ၏။ ပူပြင်းခြောက်သွေ့စပြုလာ သော၊ အကြီးတန်စပြုလာသော ကမ္ဘာမြေကလည်း စိုပြေမှုများ၊ အေးမျှမှုများဖြင့် အလှတန်ဆာဆင်ပေးရန် မေတ္တာ၊ ကရုဏာပန်းနှစ်ပွင့်ကို ငံ့လင့်လျက်ရှိ နေပါ၏။ မျှော်လင့်လျက်လည်းရှိနေပါ၏။

အရှင်စန္ဒာသီရိ(Kelaniya University)

(၂၀၁၀၊ လင်္ကာတမန်မဂ္ဂဇင်းတွင် ရေးသားခဲ့သော ဆောင်းပါး)